Yangi tadqiqot: kamida 3.6 milliard odam suv tanqisligiga duch kelmoqda
Butunjahon meteorologiya tashkilotining suv resurslariga oid yangi hisoboti eʼlon qilindi.
2050 yilda sayyora aholisining 5 milliardi suv tanqisligi bilan to‘qnashadi. Bu haqda Butunjahon meteorologiya tashkilotining “Global suv resurslari holati” hisobotida so‘z boradi.
“So‘nggi vaqtlarda iqlim o‘zgarishi oqibatlari aynan suv resurslari holatida yaqqol sezilmoqda: biz intensiv va uzoq davom etadigan qurg‘oqchiliklar, ekstremal toshqinlar, nomutanosib yog‘ingarchiliklar va muzliklar erishining tezlashishiga guvoh bo‘lyapmiz”, – degan tashkilot bosh kotibi Petteri Taalas.
Uning so‘zlariga ko‘ra, bu kabi o‘zgarishlar iqtisodiyot, ekotizim va kundalik hayotning barcha sohalariga salbiy taʼsir o‘tkazmoqda. Hisobotda hozirgi kunda 3.6 milliard odam eng kamida bir oy suv yetishmovchiligi bilan to‘qnash kelayotgani qayd etilgan.
2001-2018 yillarda Yer sayyorasidagi barcha tabiiy ofatlarning 74 foizi suv bilan bog‘liq bo‘lgan. 2021 yilda Yerning katta maydonlarida so‘nggi 30 yilda kuzatilmagan qurg‘oqchilik yuz bergan. Masalan, Janubiy Amerikaning Rio-de-La-Plata hududida 2019 yildan buyon barqaror qurg‘oqchilik kuzatilmoqda. Amazoniyaning janubi va janubi sharqi, Kolorado, Missuri va Missisipi daryolari havzalarida ham shunday holatni ko‘rish mumkin.
Afrikaning Niger, Volta, Nil va Kongo daryolarida suv darajasi 2021 yilda odatdagidan past bo‘lgan. Rossiya va Markaziy Osiyoning ayrim mintaqalarida ham shunday vaziyat kuzatilgan.
Hisobot mualliflarining fikricha, uzoq istiqbolda Braziliyaning Rio-San-Fransisko, Patagoniya, Ganga va Hind daryolarining yuqori oqimi va AQSH janubi-g‘arbidagi daryo havzalarida suv balansi kamayib boradi.
