“Real Madrid” 16 yoshli futbolchini katta pulga sotib oldi
U 18 yoshga to‘lgach, klub safiga qo‘shiladi.
Yevropa futbol klublarini qiziqtirgan braziliyalik Endrik oxir-oqibat “Real Madrid”ni tanladi. Klub 16 yoshli futbolchining transferi bo‘yicha kelishuvni rasman eʼlon qildi.
Endrik “Madrid”ga faqat 18 yoshga to‘lganda, yaʼni 2024-yilning iyul oyida ko‘chib o‘tishi mumkin. Bu vaqtgacha hujumchi o‘z vatanidagi “Palmeyras” jamoasidagi o‘yinlarini davom ettiradi.
Madridliklar yigitning transferi uchun 60 million yevro to‘laydi: 35 million allaqachon “Palmeyras”ning hisobiga tushdi, yana 25 millioni esa bonuslar. Baʼzi maʼlumotlarga ko‘ra, futbolchining maoshi yiliga 2 million yevroni tashkil qiladi. Uning shartnomasi 2027-yilgacha mo‘ljallangan va yana uch yilga uzaytirilishi mumkin.
Eslatib o‘tamiz, Endrik 2022-yilgi ichki chempionatda “Palmeyras” safida 7 ta o‘yin o‘tkazib, 3 ta gol va bitta golli uzatmani amalga oshirgan.
