O‘zbekiston diplomatlari Novosibirsk aeroportida qolib ketgan fuqarolarga yordam berishdi
Bu haqda Bosh konsulxona ishonch telefoniga xabar kelib tushgan.
O‘zbekistonning Novosibirsk shahridagi Bosh konsulxonasi ishonch telefoniga “Tolmachevo” xalqaro aeroportida 160 nafardan ziyod fuqarolar to‘planib qolgani va ular amaliy yordamga muhtojligi to‘g‘risida xabar kelib tushdi.
Bosh konsulxona xodimlari “Tolmachevo” aeroportiga yetib borib, O‘zbekiston fuqarolari bilan uchrashib, vaziyat haqida to‘liq maʼlumot oldi.
Maʼlum bo‘lishicha, “S7 Airlines” aviakompaniyasi tomonidan 13 dekabr kuni “Novosibirsk-Namangan” yo‘nalishi bo‘yicha rejalashtirilgan parvoz noqulay ob-havo sharoiti sababli vaqtincha bekor qilingan.
Bosh konsulxona Novosibirsk viloyati Transport prokuraturasi, “S7 Airlines” aviakompaniyasi, “Tolmachevo” aeroporti rahbariyati bilan muloqot olib borib, qoldirilgan parvozni tezkor tarzda tiklash chorasi ko‘rildi. Xususan, FVV, “Namangan” xalqaro aeroporti vakillaridan parvozni amalga oshirishga ruxsat beruvchi zarur maʼlumotlar taqdim etilishiga ko‘maklashildi.
Ko‘rilgan saʼy-harakatlar natijasida “Novosibirsk-Namangan” yo‘nalishi bo‘yicha aviaparvoz tiklanib, 160 nafar fuqaro O‘zbekistonga qaytarildi.
