Putin generallari bilan yig‘ilish o‘tkazdi
Kreml RF Prezidenti kecha maxsus shtabda Ukrainadagi harbiy harakatlar yuzasidan muhokamalar o‘tkazilganini maʼlum qilgan.
Vladimir Putin “maxsus harbiy amaliyot” doirasida harakatlanayotgan qo‘shin turlarining birlashgan shtabiga tashrif buyurdi. Bu haqda qator Rossiya axborot agentliklari xabar berdi.
RF Prezidentining matbuot kotibi Dmitriy Peskovning so‘zlariga ko‘ra, Putin kecha kun bo‘yi ushbu shtabda yig‘ilish o‘tkazgan. Yig‘ilish davomida “harbiy amaliyot” bo‘yicha hisobotlarni tinglagan va qo‘mondonlar bilan uchrashgan.
Rossiya telekanallarida namoyish etilgan kadrlarda Prezidentning yonida mudofaa vaziri Sergey Shoygu va Bosh shtab boshlig‘i Valeriy Gerasimovlarni ko‘rish mumkin. Kreml nomi tilga olingan shtab qayerda joylashganiga aniqlik kiritmagan.
Shu bilan birga Putin harbiy harakatlarning yaqin va o‘rta istiqbollari bo‘yicha takliflarni ko‘rib chiqishini aytgan.
