Leo Messi emotsional post yozdi
Unda jahon chempionining quvonch va qayg‘ulari bayon qilingan.
Lionel Messi jahon chempioni bo‘lish qanchalik qiyin bo‘lganini aytdi. Bu haqda u Instagramda emotsional post yozdi.
35 yoshli futbolchi jahon chempionatida g‘alaba qozonish uchun qancha vaqt ketganini aytib berdi va orzu qilingan sovrinni qo‘lga kiritishda ishtirok etgan barchaga minnatdorchilik bildirdi.
“Grandolidan (Messining birinchi klubi) Qatarda bo‘lib o‘tgan jahon chempionatigacha deyarli 30 yil o‘tdi. Bu vaqt ichida to‘p menga juda ko‘p quvonch va ozgina qayg‘u ham berdi. Men doim jahon chempioni bo‘lish haqida orzu qilganman. Men urinishdan to‘xtashni xohlamadim, hatto bu hech qachon amalga oshmasligini bilsam ham.
Qo‘lga kiritilgan bu kubok ham biz o‘ynagan oldingi jahon chempionatlarida uni ololmaganlarning hammasiga tegishli.
Bizni osmondan qo‘llab-quvvatlagan Diyego Maradonaga, har doim terma jamoani qo‘llab-quvvatlagan, natija haqida emas, balki biz haqimizda qayg‘urgan barchaga tegishli. Va, albatta, bu ajoyib jamoaga, murabbiylar shtabi va terma jamoadagi barcha insonlarga chin qalbimdan katta rahmat”, — deya postni yakunlagan hujumchi.
