"Biz 20 yilda o‘qituvchilarga eʼtibor qaratmadik. Bundan kim yutqazdi?"
Ayni vaqtda prezident Shavkat Mirziyoyev Xalqaro kongress markazida taʼlim sohasidagi islohotlar haqida murojaat qilmoqda.
Taʼlim sifatida oshirishga bag‘ishlangan uchrashuvda davlat rahbari bugungi mavzu naqadar muhimligini yana bir bor taʼkidlab o‘tdi.
“Mana bugun taʼlim sifatini oshirish, yangi darsliklar masalasida gaplashamiz. Xo‘sh, bu yangi darsliklarni farzandlarimizga kim yetkazadi? Albatta muallim! Men bekorga muallimning obro‘sini ko‘tarish haqida takror-takror gapirmayman. Bugungi globallashuv davrida taʼlim, kelajak avlod barkamolligi qay darajada muhimligini yanayam kuchliroq anglab yetyapmiz.
Bugun yoshlarimiz, bolalarimizning o‘zi “Bizga kechagi kun taʼlimi kerak emas” degan talabni qo‘yishyapti. Hozirgi islohotlarimizni reajalashtiryapmiz, katta-katta marralarni qo‘yyapmiz. Ularni aytish oson, lekin bajarish azob. Lekin har qancha qiyin bo‘lmasin biz farzandlarimiz uchun bu islohotlarni amalga oshirish uchun harakat qilishimiz shart", — dedi Davlatimiz rahbari.
Prezident Yangi O‘zbekistondagi tashabbuslarni, ayniqsa, taʼlim bo‘yicha islohotlarni chekka hududlarga ham kirib borishga harakat qilinayotgani haqida gapirdi.
“Biz avvalo ustozning, muallimning obro‘sini ko‘tarishimiz kerak. Aytish kerakki, biz 20 yilda o‘qituvchilarga eʼtibor qaratmadik. Bundan kim yutqazdi? Albatta, biz.
Navoiyga borganimda yoshlar bilan uchrashuv o‘tkazdim. Ulardan «sizlarni nima qiynayapti?», deb so‘radim. Ular javob bera olmadi. Savolga o‘zim javob berdim: «korxonalardagi yangi texnika, asbob-anjomlarni ishlatishda qiyinchiliklar bo‘lyaptimi?», degan edim, bir yigit bunga javoban «bilim yetishmayapti», dedi. Bu ham haqiqat”, — dedi prezident.
Davlat rahbari har bir inson o‘zining ertanggi kuni bo‘lgan farzandlarni muallimga ishonib topshirishi haqida ham gapirdi.
«Oxirgi yillarda taʼlimda o‘qituvchining kayfiyati, dars berishi o‘zgargani ham adolatli haqiqat. Men o‘zim ham taʼlim berganman, bilaman bu sohani. Oliy Majlisga yo‘llangan murojaatnomada aytilgan oltita yo‘nalishni bajarish azob. Lekin bugun qiynalmasak, ertaga natija bo‘lmaydi», — deya qo‘shimcha qildi Shavkat Mirziyoyev.
