Kelаsi hafta elektr energiyasida qisqa muddatli cheklovlar kiritiladi
Bu haqda Energetika vazirligi maʼlum qildi.
Energetika vazirligi: Respublika hududida havo haroratining anomal pasayishi davrida isteʼmolchilarni energiya resurslari bilan barqaror taʼminlash bo‘yicha zarur choralar belgilab olindi.
O‘zbekistonga sovuq nam havo massalari kirib kelishi munosabati bilan elektr energiyasida qisqa muddatli cheklovlar kiritiladi. Bu haqda Energetika vazirligi maʼlum qildi.
Qayd etilishicha, kelgusi hafta respublika hududida havo haroratining anomal pasayishi davrida isteʼmolchilarni energiya resurslari bilan barqaror taʼminlash bo‘yicha zarur choralar belgilab olindi.
Hafta davomida quyidagi ishlarga eʼtibor qaratiladi:
Birinchi navbatda avtomobillarga gaz to‘ldirish kompressor shoxobchalari faoliyatiga kiritilayotgan cheklovlar davom ettiriladi;
Yirik ishlab chiqarish korxonalariga tabiiy gaz yetkazib berish hajmi keskin kamaytiriladi;
Energotizimdagi yirik isteʼmolchilarning kunlik elektr energiyasi isteʼmoli kamaytiriladi va tejalgan 11-12 mln kVt-soat elektr energiyasi aholi isteʼmoliga yo‘naltiriladi;
Mahalliy hokimliklar bilan kelishilgan holda tasdiqlangan grafiklarga asosan qisqa muddatli cheklovlar kiritiladi;
Elektr energiyasini ishlab chiqaruvchi issiqlik elektr stansiyalari va markazlarning barqaror ishlashini taʼminlash maqsadida kuniga o‘rtacha 49 mln kub metr tabiiy gaz yetkazib beriladi;
Bugungi kunda mazkur stansiyalar uchun 90 ming tonna mazut va 280 ming tonna ko‘mir yoqilg‘isi zaxirasi yaratildi;
Isteʼmolchilarga kunlik ko‘mir yetkazib berish hajmi 5000 tonnadan 8000 tonnaga oshiriladi.
Aytilishicha, ikki soatdan oshmagan vaqt oralig‘ida hududlar kesimida joriy etilayotgan cheklov grafiklari barcha viloyat hududiy elektr tarmoqlari korxonalarining ijtimoiy tarmoqdagi sahifalarida eʼlon qilib boriladi.
Shuningdek, anomal sovuq kunlarida tarmoqlarda yuzaga kelishi mumkin bo‘lgan nosozliklarni bartaraf etish uchun elektr va gaz taʼminoti korxonalarida tunu-kun ishlaydigan 1000 dan ortiq maxsus brigada tashkil etildi.
