Anomal sovuq "Ippodrom"ni ham siltab o‘tdi — video

 

Toshkent shahar IIB ijtimoiy tarmoqlarda savdo rastalaridagi soyabonlar qulab tushgani aks etgan videoxabarlar yuzasidan izoh berdi.

 

Xabarga ko‘ra, joriy yilning 10 yanvar kuni Chilonzor tumanida joylashgan “Chilonzor buyum savdo kompleksi” AJ hududidagi 3-4 ayvonlar yon tomoni va 5-6 ayvonlar orqa tomonida yo‘laklarda o‘rnatilgan soyabonlar (naves) qor qalin yog‘ganligi sababli, og‘irlikni ko‘tara olmay egilib tushgan. Shu hududdagi fuqarolar va tadbirkorlar ularning xavfsizligini taʼminlash maqsadida evakuatsiya qilindi. Ushbu savdo do‘konlari bozor maʼmuriyati bilan hamkorlikda vaqtinchalik yopildi. Hodisa natijasida tan jarohati olganlar yo‘q.

 

Poytaxt IIB fuqarolardan qor qalin yog‘gani sababli mustahkam bo‘lmagan to‘sinlar, soyabonlar va boshqa moslamalar ostida yurmaslikni so‘ragan.