Feliks nimaga “Chelsi”ni tanladi?
Uning “Atletiko” murabbiyi bilan munosabati yaxshi bo‘lmagan.
Dekabr oyi boshida “Atletiko” bosh direktori Migel Anxel Gil Marin Joao Feliks - klub qilgan eng katta sarmoya ekanligini aytdi. 2019 yilda futbolchi uchun 127,2 million yevro to‘langandi. Biroq, so‘nggi vaqtlarda portugaliyalik futbolchi va jamoa bosh murabbiyi Diyego Simeone o‘rtasidagi munosabatlar keskinlashdi. Shu tufayli futbolchining motivatsiyasi keskin tushib ketdi. Ijrochi direktor futbolchini saqlab qolish imkoniyati yo‘q ekanligi, uning jamoadan ketishi ehtimoli nihoyatda yuqori ekanligini inkor etmadi.
Shu bilan birga, Simeone o‘zi va futbolchi o‘rtasida hech qanday muammo yo‘qligini taʼkidladi: “Feliks bilan yaxshi munosabatdamiz. Ha, har qanday odamlar o‘rtasida qandaydir qarama-qarshiliklar bo‘ladi. Lekin biz klub uchun eng yaxshisini qilishga intilishimiz kerak. Men uchun jamoa muhim, ular uchun esa Joau. Agar u jahon chempionatidagidek o‘ynasa, biz uchun muhim futbolchi bo‘ladi”. O‘tgan yilning oxirida Feliks murabbiydan yangi jamoa topishni xohlayotgani haqida mish-mishlar tarqaldi. “Record” nashrining xabariga ko‘ra, Madrid klubi uni qishda ijaraga berishga rozi bo‘lgan.
Bu xabardan so‘ng, Premyer-liga klublari, jumladan, “Chelsi” ham futbolchi uchun ariza topshirayotgani haqida xabarlar paydo bo‘ldi. Londonliklar mavsumning ikkinchi qismida kuchayish uchun olti oylik ijaraga qiziqish bildirishdi. Yakunda tomonlar kelishuvni rasman eʼlon qilishdi. Joau Madrid klubi tarixidagi eng qimmat transferga aylandi va Antuan Grizmann “Barselona”ga ketganida jamoaning katta umidi bo‘ldi. Ammo bu vaqt davomida portugaliyalik futbolchining statistik maʼlumotlari unga to‘langan pulga ham, kutganlarga ham to‘g‘ri kelmadi. Bunday statistik va sportdagi omadsizliklarni Feliksning maydondagi pozitsiyasi bilan izohlash mumkin: u o‘ng qanot pozitsiyada harakat qilishni afzal ko‘rishini aytgan, ammo Simeonening “Atletiko”da taktikasi biroz boshqacha edi. Simeone esa qatʼiy tartib-intizomni yaxshi ko‘radi. 2021 yilning bahorida murabbiy shunday degan edi: “Isteʼdod yetarli emas, Joauga shaxsiyat va harakat kerak”. Bundan tashqari Feliks jamoa bilan to‘liq kelisha olmaydi. Bu, shubhasiz, Simeonening rejalariga taʼsir o‘tkazadi. Shu sababli bu mavsumda Simeone Feliksni zaxira o‘yinchiga aylantirdi.
Feliksda qanday imkoniyatlar bor edi?
Ispaniya ommaviy axborot vositalari “Bavariya”, “PSJ” va “Barselona” futbolchiga qiziqish bildirishganini maʼlum qilishdi. Ammo, Premyer-liga uning uchun eng ehtimolli variant edi. Uning agenti Xorxe Mendes kuzda bir qancha ingliz klublari bilan bog‘lanib, yozgacha ijaraga olish imkoniyatlarini muhokama qilgan. Klubga ham, futbolchining vakiliga ham mos keladigan dastlabki shartlar 21 million yevro ijara to‘lovi atrofida bo‘lib, undan Atletiko Madrid 15 million yevro oladi, qolgan 6 million yevro esa futbolchining o‘zida qoladi. “Manchester Siti” hujumchiga eʼtibor qaratmadi. Ammo “Arsenal”, “Manchester Yunayted” va “Chelsi” klublari qiziqish bildirishdi. Hozir birinchi o‘rinda borayotgan Artetaning jamoasi hujumni kuchaytirish uchun, ayniqsa, Gabriyel Jezus jahon chempionatida jarohat olganidan keyin bu futbolchiga jiddiy qiziqish bildirdi. “Arsenal” bosh murabbiyi allaqachon bitta forvard Edvard Nketya bilan o‘ynash oson emasligini, shuning uchun mavjud o‘yinchilardan unumli foydalanish bilan bir qatorda, kimnidir sotib olish yaxshi fikr bo‘lishini aytdi. “Manchester Yunayted”da ham hujumchilar bilan muammolar bor, ayniqsa Krishtianu Ronaldu ketganidan keyin. “Chelsi”da ham “Arsenal” kabi bu chiziqda muammo bor edi. Shuning uchun uchta klub portugaliyalik uchun kurashga qo‘shilishga tayyor edi, ammo agent va “Atletiko”ning futbolchiga qo‘ygan narxi ularni qoniqtirmadi. Natijada, “Chelsi” bilan kelishuvga erishildi.
Nega Feliks “Chelsi”ni tanladi?
“Chelsi”da katta muammolar bor. Broya, Pulishich, Sterling, Mount, Loftus-Cheek - barchasi jarohatlangan yoki endigina formaga kirishgan. Hujumda Aubameyang va Haverts bor, ammo bu yetarli emas.
Premyer-ligada “Chelsi” bor-yo‘g‘i o‘ninchi o‘rinda bormoqda. Jamoa Chempionlar Ligasi to‘rtligidan 10 ochkoga ortda qolmoqda. Buning uchun ko‘p mehnat qilish kerak. Shu sababli klub kuchli futbolchilarga muhtoj ekanligi maʼlum bo‘ldi. Feliks uzoq vaqt davomida yangi talablarga moslashib olishi haqida savollar bor. Madridda unga bir yil kerak bo‘ldi.
