O‘tgan yili qancha jurnalist o‘ldirildi?
YUNESKOning navbatdagi hisobotida 2022 yil davomida OAV xodimlari duch kelgan xavflar, jurnalistlar uchun eng xavfli bo‘lib qolayotgan davlatlar va jazosiz qolayotgan jinoyatlar haqida so‘z boradi.
YUNESKO maʼlumotlariga ko‘ra, 2022 yilda dunyoda 86 ta jurnalist o‘ldirilgan. Bu haqda BMT matbuot xizmati xabar berdi.
O‘tgan yili deyarli har 4 kunda bir marta OAV xodimi vafot etgan. Bu 2021 yilga nisbatan 50 foizga ko‘p. Statistikada jurnalistlar o‘z faoliyati davomida duch kelayotgan jiddiy xatarlar tilga olingan.
“Bir necha yillik pasayishlardan so‘ng 2022 yilga jurnalistlar o‘limi soni oshishi xavotirlarni keltirib chiqardi. Davlatlar bu jinoyatlarni to‘xtatish uchun choralar ko‘rishi va aybdorlarni jazolashi shart. Befarqlik zo‘ravonlik muhitining shakllanishi uchun asosiy omil bo‘lib qolmoqda”, – degan YUNESKO bosh direktori Odre Azule.
2019-2021 yillarda dunyo bo‘ylab 58 ta OAV xodimi o‘ldirilgandi.
Jurnalistlar dunyoning barcha mintaqalarida o‘ldirilgan. Ammo eng ko‘p qurbonlar Janubiy Amerika va Karib havzasiga to‘g‘ri keldi (44 ta holat). Osiyo-Tinch okeani mintaqasida 16 ta, Sharqiy Yevropada 11 OAV vakili halok bo‘lgan. Davlatlar bo‘yicha Meksika (16 ta qotillik), Ukraina (10 ta qotillik) va Gaiti (9 ta qotillik) yetakchilik qilmoqda.
Jurnalistlarning yarmidan ko‘pi ishdan tashqari vaqtda halok bo‘lgan. Ular asosan, avtoturargohlarda, uyida va boshqa jamoat joylarida o‘ldirib ketilgan. Bu so‘nggi yillarda kuzatilayotgan tendensiyaning davom etayotganini anglatadi: jurnalistlar uchun xavfsiz joy qolmayapti.
So‘nggi besh yilda ayrim yutuqlarga erishilganiga qaramay, qotilliklarning 86 foizi jazosiz qolmoqda. Bu jurnalistlar faoliyatiga salbiy taʼsir ko‘rsatishi va jurnalistikaning xavfli kasb bo‘lib qolishiga sabab bo‘ladi.
