Nest One‘ning 9 nafar quruvchisi ovqatdan zaharlandi
Qayd etilishicha, ishchilar oziq-ovqat tashkilotlaridan biri tomonidan obyektga yetkazib beriladigan mahsulotlarni isteʼmol qilgan.
Toshkentdagi Nest One turar joy majmuasini qurish ishlari bilan shug‘ullanayotgan O.M.I. xorijiy kompaniyasining 9 nafar xodimi o‘tkir ichak infeksiyasi bilan og‘rib qoldi. Bu haqda Bosh prokuratura matbuot kotibi Hayot Shamsutdinov maʼlum qildi.
Qayd etilishicha, quruvchilar oziq-ovqat tashkilotlaridan biri tomonidan obyektga yetkazib beriladigan mahsulotlarni isteʼmol qilgan.
Shayxontohur tumani prokuraturasi tomonidan o‘tkazilgan tergovoldi tekshiruvlari davomida holat yuzasidan Jinoyat kodeksining tegishli moddalari bilan jinoyat ishi qo‘zg‘atilgan.
Tergov davomida aybdor shaxslarning harakatiga huquqiy baho beriladi.
18 yanvar kuni Sanepidxizmat Toshkentda faoliyat ko‘rsatayotgan qurilish firmasining 20 nafar ishchisida ovqatdan zaharlanish holati aniqlanganini maʼlum qilgandi. Qurilish firmasining ishchilari tez tibbiy yordam mashinasida Respublika ixtisoslashtirilgan epidemiologiya mikrobiologiya va parazitar kasalliklar ilmiy-amaliy tibbiyot markazi qabul bo‘limiga ovqat toksikoinfeksiyasi shubhasi bilan olib kelingan.
