46 yilda kuzatilmagan maksimal o‘sish: Buyuk Britaniyada oziq-ovqat narxi keskin ko‘tarilmoqda
Mamlakat Bosh vaziri Rishi Sunak joriy yilda inflyatsiya darajasini yarmiga tushirishga va iqtisodiy o‘sishni taʼminlashga vaʼda bermoqda.
Buyuk Biritaniyada oziq-ovqat mahsulotlari 16,8 foizga qimmatlashdi. Yoqilg‘i narxi arzonlashgan bo‘lsa-da, sut, pishloq va tuxum kabi asosiy oziq-ovqat mahsulotlari narxi osmonga ko‘tarilmoqda. Bundan tashqari, restoran, mehmonxona xizmatlari va aviachiptalar qimmatlashdi, deb xabar berdi Kazinform muxbiri.
Masalan, sut o‘tgan yilga nisbatan 50 foizga oshgan. Makaron mahsulotlari va shakar narxi ko‘tarilgan.
Qiyinchilikda qolganlar oziq-ovqat banki yordamiga murojaat qilishga majbur. Fudbank — oylik daromadi yetmaydiganlarga haftada bir marta oziq-ovqat bepul tarqatiladigan joy.
Hammasi homiylar hisobidan. Xayriya markaziga do‘konlar oziq-ovqat, tadbirkorlar esa pul bilan yordam beradi.
Yashash narxi oshgan bir paytda oziq-ovqat bankidan yordam so‘raganlar soni ham ko‘paygan. Ko‘p bolali yolg‘iz Donna Xey ana shu markaz tufayli o‘zini-o‘zi boqish imkoniyatiga ega ekanini aytadi.
«Kechasi bolalarim och yotdi. Men hatto elektr energiyasi, gaz, ijara haqini ham to‘lay olmayman», — dedi u.
Londonning Xakni tumanidagi oziq-ovqat banki olti yil avval kam taʼminlangan oilalarga oziq-ovqat bilan yordam berish uchun oyiga 2000 funt sterling sarflagan bo‘lsa, hozir haftasiga 4000 funt sterling sarflaydi.
«Baʼzi oilalar yorug‘lik va issiqlikni tejash uchun pechka va gazni o‘chirishga majbur. Ular hatto biz beradigan taomni ham pishirib, yeya olmaydi», — deydi xayriya tashkiloti vakili Met Fitsimons.
Buyuk Britaniya Bosh vaziri Rishi Sunak joriy yilda inflyatsiya darajasini yarmiga tushirishga va iqtisodiy o‘sishni taʼminlashga vaʼda bermoqda.
