Vazirlik va idoralardagi xodimlar 30 foizga qisqartirilmoqda
Bu bo‘yicha Prezidentning tegishli farmoni qabul qilindi.
Maʼmuriy islohotlarning navbatdagi bosqichini amalga oshirish maqsadida imzolangan Prezidentning tegishli Farmoniga ko‘ra, vazirlik va idoralarda byudjet va nobyudjet mablag‘laridan moliyalashtiriladigan jami 17 447 ta boshqaruv va ishlab chiqarish shtat birliklari qisqartirilmoqda (umumiy songa nisbatan 24 foiz).
Shu jumladan, vazirlik va idoralar rahbarlari o‘rinbosarlari soni 207 nafardan 144 nafargacha yoki 30 foizga qisqartirilmoqda.
Shuningdek, dastlabki hisob-kitoblarga muvofiq, 703 ta avtotransport vositalari va 10 ta binolar bo‘shaydi.
Mazkur chora-tadbirlar natijasida:
-
shtatlar sonini qisqartirish hisobiga 1,5 trillion so‘m;
-
avtotransport vositalari sonini qisqartirish hisobiga (shu jumladan, yoqilg‘i-moylash, shinalarni almashtirish xarajatlari) 70 milliard so‘m byudjet mablag‘lari iqtisod qilinmoqda.
Vazirlik va idoralarda xodimlarning umumiy cheklangan soni 56 573 nafar etib belgilanmoqda.
Shuningdek, vazirlik va idoralarning nobyudjet mablag‘laridan qo‘shimcha boshqaruv shtatlarni kiritish qatʼiy taqiqlanmoqda.
