AOKA: Human.uz'dan foydalanish cheklanmagan
Bugun ushbu saytning ikki xodimi "organ xodimlari" tomonidan olib ketilgani to'g'risida xabarlar tarqalgandi.
Ijtimoiy tarmoq va veb-saytlarda bugun, 27-yanvar kuni human.uz internet-nashri direktori, bosh muharriri va boshqa xodimlarini o‘zini «organ xodimlari» deb tanishtirgan kishilar tomonidan internet-nashrning ofisidan olib ketilgani, shuningdek, mazkur veb-sayt ishlamayotgani bilan bog‘liq xabarlar tarqaldi.
Yuqoridagilardan kelib chiqib, Agentlik huquqni muhofaza qiluvchi organlar va Raqamli texnologiyalar vazirligiga tegishli so‘rovlarni yubordi.
Aniqlanishicha, prokuratura organlariga fuqarolardan ushbu internet nashrda ishlovchi xodimlar bilan bog‘liq murojaatlar kelib tushgan. Ularga asosan Toshkent viloyati, Qibray tumani, Universitet ko‘chasi, 2-uyda tezkor tadbir tashkil etilgan. Tez orada batafsil ma’lumot berilishi ta’kidlandi.
Raqamli texnologiyalar vazirligining ma’lumotiga ko‘ra, human.uz veb-sayti O‘zbekiston Respublikasi qonunchiligi bilan tarqatilishi taqiqlangan axborot mavjud bo‘lgan Internet tarmog‘i Reyestriga kiritilmagan va O‘zbekiston Respublikasi hududida undan foydalanilishiga chek qo‘yilmagan.
AOKA huquqni muhfaza qiluvchi organlarini human.uz internet-nashri xodimlari bilan bog‘liq vaziyatda amaldagi qonun hujjatlariga rioya qilinishiga hamda fuqarolarning huquqlari va erkinliklari ta’minlanishiga chaqiradi.
