Bu hafta sel, ko‘chki va suv toshqinlari yuzaga kelishi ehtimoli bor
Favqulodda vaziyatlarni oldini olish bo‘yicha doimiy shtab tashkil etildi.
“O‘zgidromet” maʼlumotlariga ko‘ra, shu haftadan havo harorati kunduzi +10 darajagacha va kechalari +3 darajagacha ko‘tariladi. Hatto tog‘ oldi va tog‘li hududlarda +2+7 daraja iliq bo‘lishi kutilmoqda.
Havo haroratining ko‘tarilishi natijasida qor va muzlar erishi tezlashib, sel, ko‘chki va suv toshqinlarining yuzaga kelish ehtimolini yana-da kuchaytiradi.
Bosh vazir Abdulla Aripov raisligida yuzaga kelishi mumkin bo‘lgan sel oqimlari, toshqinlar va ko‘chki hodisalari bilan bog‘liq favqulodda vaziyatlarning oldini olish bo‘yicha ustuvor vaziflar muhokamasiga bag‘ishlangan videoselektor yig‘ilishi o‘tkazildi.
Yig‘ilishda mavjud holat hududlar kesimida chuqur tahlil qilinib, yuzaga kelishi mumkin bo‘lgan salbiy hodisalarni oldini olish va bartaraf etish yuzasidan tegishli vazirlik va idoralar hamda hokimliklar rahbarlariga topshiriqlar berildi.
Prezident Shavkat Mirziyoyev topshirig‘iga asosan sel oqimlari, toshqinlar va ko‘chki hodisalari bilan bog‘liq favqulodda vaziyatlarning oldini olish bo‘yicha doimiy shtab tashkil etildi.
Shuningdek, davlatimiz rahbarining 2022 yil 18 noyabrdagi 426-son qaroriga bilag Toshqinga qarshi hukumat hamda hududiy komissiyalar tuzilgan va ularning asosiy vazifalari belgilangan.
Vazirlar Mahkamasida o‘tgan yig‘ilish bayoni bilan ushbu Komissiya aʼzolari Qoraqalpog‘iston Respublikasi, viloyatlar va Toshkent shahri hududlariga biriktirildi.
