Poytaxtni chang yutmoqda
Toshkent havo sifati eng yomon bo‘lgan dunyodagi top-20 ta shaharlar orasidan joy oldi.
Toshkentda havo sifatining yomonligi aholi sog‘ligiga bir yilda 503 ta sigaret chekilgandek taʼsir qiladi. Bu haqda House Fresh xalqaro jamoatchilik loyihasining havo sifati bo‘yicha tadqiqotida maʼlum qilingan.
Toshkent havo sifati eng yomon bo‘lgan dunyodagi top-20 ta shaharlardan biri hisoblanib, ro‘yxatda 16-o‘rindan joy olgan. Toshkentdan keyin, 17-o‘rinda Qozog‘istonning Olmaota shahri joylashgan.
Tadqiqotda keltirilishcha, Yaqin Sharq va Janubi-Sharqiy Osiyodagi shaharlarda havoning sifati eng yomon buzilgan. Shu tarzda bilvosita “chekilgan” sigaretlarning eng ko‘p soni Bangladesh poytaxti Dakka aholisiga to‘g‘ri keladi — 1176 ta. Shuningdek, Bag‘dod shahri havoning iflosligi bo‘yicha dunyoda ikkinchi o‘rinda turibdi. Bu shahar aholisi yomon sifatli havo tufayli har yili bilvosita 1009 ta sigaret “chekishadi”.
House Fresh mazkur tadqiqotni o‘tkazish uchun dunyo bo‘ylab shaharlardagi PM2,5 — o‘lchami 0,001 dan 2,5 mikrometrgacha bo‘lgan zarrachalarning o‘rtacha konsentratsiyasi haqidagi maʼlumotlarni tahlil qilib, ularni salomatlikka salbiy taʼsir ko‘rsatishi bo‘yicha yiliga passiv chekiladigan sigareta ekvivalent soniga aylantirishgan. Buning uchun Berkeley Earth formulasidan foydalanilgan.
