PFL bir yillik moliyaviy hisobotlarni ochiqladi
Bugun OAV xodimlari ishtirokida yig‘ilish bo‘lib o‘tdi.
Bugun O‘zbekiston Professional futbol ligasi “Bunyodkor” stadionining anjumanlar zalida 2022 yilda qilingan ishlar bo‘yicha moliyaviy hisobotni taqdim etdi.
Unda liga rahbariyati 2022-yilda qator yo‘nalishlarda qancha xarajat qilingani va tashkilotning yillik daromadlarini ochiqladi.
Maʼlum bo‘lishicha, 2022-yilda tashkilotga kelib tushgan mablag‘ 18 712 135 600 so‘mni tashkil qilgan. Shundan 9 467 135 600 so‘mi homiylar tomonidan jalb qilingan mablag‘ hisoblanadi. Badal pullari 5 595 000 000, legioner futbolchilar uchun to‘lov esa 3 030 000 000 so‘mni tashkil qilgan.
Yig‘ilgan mablag‘larning 50,6 foizi PFLning o‘zi tomonidan topilgan pullar, 49,4 foizi esa badal pullari evaziga to‘plangan.
Bundan tashqari PFL o‘z tasarrufidagi turli musobaqalarni "Eleven Sports" portali orqali translyatsiya qilishdan ham 33 350 yevro ishlab topgan. Bu yarim yillik daromad hisoblanadi.
PFL bosh direktori Diyor Imomxo‘jayevning so‘zlariga ko‘ra, tashkilot hali badal pullari, homiylar va legionerlar uchun to‘lovdan umumiy hisobda 1 065 000 000 so‘m olmagan.
