Rossiya va Ukraina Shveysariyada muzokara o‘tkazyaptimi?
Ukraina TIV rahbari bu masalaga oydinlik kiritdi.
Rossiya va Ukraina Shveysariyada hech qanday muzokara o‘tkazmayapti. Bu haqda Ukraina TIV rahbari Dmitriy Kuleba maʼlum qildi.
“Agar qandaydir ukrainaliklar ruslar bilan Jenevada gaplashayotgan bo‘lsa, ular Ukrain davlatining rasmiy vakillari emas”, — degan u Italiya OAVga bergan intervyusida.
Vazirning qo‘shimcha qilishicha, Kiyev muzokaralarga har qanday paytda tayyor. Ammo buning uchun Rossiya o‘z qo‘shinlarini olib chiqib ketishi kerak.
“Hozir hech narsa Rossiya muzokaralarga tayyorligini ko‘rsatmayapti. Biz vaziyat tezroq o‘zgarishiga va ruslar muzokara boshlashiga umid va ibodat qilamiz”, –– deb qayd etgan diplomat.
Kuleba Xitoy taklif etgan tinchlik rejasiga ham munosabat bildirdi. Uning so‘zlariga ko‘ra, Pekinning rejasi umumiy masalalarni qamrab olgan va “adolatli tinchlikka erishishga yordam bermaydi”.
Avvalroq Shveysariya tashqi ishlar vaziri Inyatsio Kassis Jenevada Ukrainadagi vaziyat bo‘yicha muzokaralar o‘tkazilayotganini aytgandi. Vazirlik rahbari boshqa tafsilotlarni keltirmagan.
