“El-Klasiko” avvalgi shiddat va hayajonini yo‘qotgan”
O‘zil Ispaniyadagi xotiralari bilan o‘rtoqlashdi.
Yaqinda professional futboldagi faoliyatini yakunlaganini eʼlon qilgan Germaniya va “Real”ning sobiq futbolchisi Mesut O‘zil Ispaniyadagi faoliyati haqida fikr bildirdi.
“O‘ylashimcha, men “El-Klasiko”ning eng yaxshi davrini, “Real” va “Barsa” o‘rtasidagi eng yaxshi o‘yinlarni, Chempionlar Ligasi yarim finalini ko‘rdim. Mourinyo Gvardiolaga qarshi, Ronaldu esa Messiga qarshi. Juda ajoyib. Endi “El-Klasiko” shiddati va hayajonini yo‘qotdi. 2010 yilda “Barsa”ga 0:5 hisobida mag‘lub bo‘lish maydondagi eng yomon tushlarimdan biri. Men ko‘p o‘yin o‘tkazdim, ko‘plab derbilarda ishtirok etdim, lekin menimcha, hech qachon “El-Klasiko”ga o‘xshagan narsa endi qaytmaydi”, - deya O‘zilning so‘zlaridan “Marca” nashri iqtibos keltirdi.
Eslatib o‘tamiz, Mesut O‘zil 21 yoshida “Verder”dan 15 million yevro evaziga “Real”ga o‘tgandi. Nemis yarim himoyachisi Ispaniyada uchta sovrinni qo‘lga kiritdi: chempionat oltin medali (2012), kubok (2011) va superkubok (2012).
