Futbolchilar bilan kelisholmagan Konte London klubidan ketdi
Jamoa rasmiy sayti bu haqda maʼlum qilgan.
Italiyalik mutaxassis Antonio Konte endi “Tottenhem” bosh murabbiyi emas, bu haqda London klubi rasmiy sayti xabar berdi.
“Biz bosh murabbiy Antonio Konte bilan hamkorlikni o‘zaro kelishuv asosida to‘xtatayotganimizni maʼlum qilamiz. Antonioning klubdagi birinchi mavsumidayoq Chempionlar ligasiga yo‘llanma oldik. Biz Antonioga qo‘shgan jamoa rivoji uchun qo‘shgan hissasiga minnatdorchilik bildiramiz. Kristian Stellini jamoani mavsum oxirigacha bosh murabbiy vazifasini bajaruvchi, Rayan Meyson esa bosh murabbiy yordamchisi sifatida boshqaradi” — deyiladi klub bayonatida.
Eslatib o‘tamiz, “Tottenhem” 28 turdan keyin 49 ochko to‘plagan holda Premyer-ligada to‘rtinchi o‘rinni egallab turibdi. Klub Chempionlar ligasi va Angliya kubogidan chiqib ketgan. “Shporlar” xo‘jayini Daniyel Levining so‘zlariga ko‘ra, klubning asosiy maqsadi keyingi mavsumda Chempionlar ligasiga chiqish.
