13 yoshli qiz 4 nafar erkak tomonidan zo‘rlangani aytildi
Buxoro viloyati IIB axborot xizmati rahbari holat yuzasidan maʼlumot berdi.
Mahalliy nashrlardan birida Buxoroda 13 yoshli qiz cho‘lda 4 nafar erkak tomonidan zo‘rlangani haqida xabar tarqaldi.
Xabarda maʼlum qilinishicha, qiz onasi vafot etgani sababli akasining oilasi bilan birga yashagan. Qizning yangasi uni begona erkaklar bilan jinsiy aloqa qilishga majbur qilib kelgan. Erkaklar qizning qarshiligiga qaramay, unga nisbatan kuch ishlatishib, jinsiy zo‘ravonlik qilishgan. Yanga qizni 4 nafar erkak qo‘liga topshirgan. Erkaklar qizni cho‘ldagi kulbalardan biriga majburlab, olib borishgan. Haydovchidan tashqari, uch nafar erkak 13 yoshli qizni navbatma-navbat zo‘rlagan.
Buxoro viloyati IIB axborot xizmati rahbari Shuhrat Jalolovning aytishicha, holat yuzasidan Buxoro viloyati IIB Tergov boshqarmasi tomonidan JKining 118-moddasi (Nomusga tegish), 4-qismi (o‘n to‘rt yoshga to‘lmagan shaxsning nomusiga tegish, o‘n besh yildan yigirma yilgacha ozodlikdan mahrum qilish bilan jazolanadi) bilan jinoyat ishi qo‘zg‘atilib, tergov harakatlari olib borilmoqda.
Ayni paytda, 13 yoshli qizni cho‘lga olib chiqib, unga zo‘ravonlik qilganlikda gumonlangan uch shaxs hamda haydovchi ushlanib, qamoqqa saqlanmoqda. Yana bu ishga daxldorlar bor-yo‘qligi tajribali tergovchi tomonidan aniqlanmoqda. Barcha jarayonlar qonun doirasida, haqqoniy olib boriladi. Tergov yakuni bo‘yicha qonunda belgilangan tartibda aybdorlarga nisbatan jazo choralari qo‘llaniladi.
