“Tottenhem” Nagelsman nomzodidan voz kechdi
Klub uchta mutaxassisga jiddiy qiziqmoqda.
Londonning “Tottenhem” klubi 35 yoshli Yulian Nagelsmanning jamoa bosh murabbiyligiga davogar sifatidagi nomzodiga qiziqishni to‘xtatdi. Klub vakillari nemis mutaxassisi bilan hech qanday muzokaralar bo‘lmagani va rejalashtirilmaganini taʼkidlamoqda. Bu haqda “Evening Standard” nashri xabar berdi.
Eslatib o‘tamiz, Nagelsmann 24 mart kuni ”Bavariya” bosh murabbiyligidan bo‘shatilgandi, ikki kundan so‘ng “Tottenhem” va keyinroq jamoa ustozi Antonio Konte o‘zaro shartnomani bekor qildi. So‘ng Rayan Meyson joriy mavsum oxirigacha “shporlar”ni boshqarishi maʼlum qilindi. Ammo klub hozirdanoq yangi bosh murabbiy izlamoqda. Nagelsman esa asosiy nomzodlar qatorida edi.
Qayd etilishicha, londonliklar Luis Enrike, Ruben Amorim (“Sporting” bosh murabbiyi), Arne Slot (“Feyenord Rotterdam”), Xabi Alonso (“Bayer”) kabi mutaxassislarga qiziqish bildirishmoqda.
