“Barsa” mavsum oxirida Xordi Albaning ketishini eʼlon qildi
Tomonlar o‘zaro kelishuvga erishishdi.
“Barselona” o‘zining rasmiy saytida 2022/2023 yilgi mavsum yakunida himoyachi Xordi Albani tark etishini eʼlon qildi. Albaning “Barselona” bilan shartnomasi yana bir mavsumga mo‘ljallangan edi, biroq tomonlar erta xayrlashish bo‘yicha kelishuvga erishdilar.
"Klubimiz Xordi Albaga professionalligi, fidoyiligi shuningdek, “Barselona” oilasining barcha aʼzolari bilan doimiy ijobiy va do‘stona munosabatlari uchun ochiqdan-ochiq minnatdorchilik bildiradi. Xordiga kelajakda omad tilab qolamiz!" - deb yozdi klub matbuot xizmati.
“Barselona” bilan 11 mavsumda Alba 458 o‘yin o‘tkazib, 27 gol urdi va 99 golli uzatmani amalga oshirdi. 34 yoshli himoyachi kataloniyaliklar bilan 18 ta sovrin yutib, 6 marta Ispaniya chempioni bo‘ldi va bir marta Chempionlar ligasida g‘olib chiqdi.
Eslatib o‘tamiz, avvalroq “Barselona” mavsum yakunida yana bir faxriy futbolchi Serxio Busketsning ketishini eʼlon qilgan edi.
