Afg‘onistondagi maktabda qizlar zaharlandi
Hozirda 60 nafarga yaqin qiz shifoxonaga yotqizilgan.
Afg‘oniston shimolidagi maktablardan birida 60 ga yaqin qizlar zaharlanib, kasalxonaga yotqizildi. Qayd etilishicha, voqea Afg‘onistonning Sar-e-Pol viloyatida sodir bo‘lgan.
Politsiya maʼlumotlariga ko‘ra, nomaʼlum shaxslar qizlar maktabiga kirib, sinf xonalarini zaharlagan. Qizlar darsga kelganida o‘zini yomon his qila boshlagan. Huquq-tartibot idoralari xodimlari qanday modda qo‘llangani va bu hodisa ortida kim turganiga aniqlik kiritmadi.
2021 yilda hokimiyatni qo‘lga kiritgach, “Tolibon” ayollarni o‘rta maktab va universitetlarda o‘qishini taqiqladi. Bu xalqaro hamjamiyat va ko‘plab afg‘onlar tomonidan qoralandi.
Keyinchalik “Tolibon” 12 yoshgacha bo‘lgan qizlar uchun boshlang‘ich maktablar ochishga ruxsat berdi va ular muayyan shartlar ostida ayollarning taʼlim olishini qo‘llab-quvvatlashini taʼkidladi.
