Shavkat Mirziyoyev Lombardiya gubernatori bilan uchrashuv o‘tkazdi
O‘zbekiston bilan Lombardiya viloyati o‘rtasida keng ko‘lamli hamkorlik dasturi tayyorlanadi.
Italiyaga rasmiy tashrifining ikkinchi kunida Shavkat Mirziyoyev Lombardiya gubernatori Attilio Fontana bilan uchrashuv o‘tkazdi. Bu haqda Prezident matbuot xizmati xabar berdi.
Uchrashuv avvalida davlat rahbari Attilio Fontanani gubernator etib qayta saylangani bilan tabrikladi va ushbu lavozimdagi faoliyatiga muvaffaqiyatlar tiladi. Shuningdek, Italiya prezidenti Serjo Mattarella va Bosh vazir Jorja Meloni bilan o‘tgan muzokaralar samarali bo‘lgani mamnuniyat bilan qayd etilib, ular davomida hududlararo aloqalarni rivojlantirish qo‘llab-quvvatlangani taʼkidlandi.
Uchrashuvda, eng avvalo, savdo-iqtisodiy sohadagi o‘zaro manfaatli hamkorlikning amaliy jihatlari muhokama qilindi.
«O‘tgan yilda O‘zbekiston hududlarining Lombardiya bilan tovar ayirboshlash hajmi 83 foizga oshdi. Aprel oyida Milan va Toshkent o‘rtasidagi aviaqatnovlar qayta tiklandi. Hududning Pietro Fiorentini, Terranova, Danieli, Fin. Opera kabi yetakchi kompaniyalari bilan mustahkam sheriklik aloqalari yo‘lga qo‘yilgan», — deyiladi xabarda.
Shavkat Mirziyoyev shuningdek, qo‘shma savdo va investitsiya loyihalari portfelini kengaytirish, Italiyaning ilg‘or texnologiya va bilimlarini O‘zbekiston iqtisodiyoti tarmoqlariga yana-da keng jalb qilish muhimligini taʼkidladi. Bundan tashqari, Lombardiya bilan keng ko‘lamli hamkorlik dasturini tez fursatda tayyorlash, Samarqandda qo‘shma investitsiya forumini o‘tkazish zarurligi ko‘rsatib o‘tildi.
Sanoat kooperatsiyasini rivojlantirish, tadbirkorlik tashabbuslarini ilgari surish uchun qulay sharoitlar yaratish, tibbiyotda davlat-xususiy sheriklik loyihalarini amalga oshirish, innovatsiyalarni rivojlantirish, madaniy-gumanitar aloqalarni kengaytirish, shu jumladan madaniyat kunlarini o‘tkazish masalalariga alohida etʼtibor qaratildi.
Gubernator Lombardiya ishbilarmon doiralarining O‘zbekistondagi loyiha va tashabbuslari har tomonlama qo‘llab-quvvatlanayotgani uchun O‘zbekiston Prezidentiga samimiy minnatdorlik bildirdi hamda O‘zbekiston bilan keng ko‘lamli va o‘zaro manfaatli sheriklikka ko‘maklashishga tayyorligini taʼkidladi.
Uchrashuv yakunida Shavkat Mirziyoyev rahbari Attilio Fontanaga 2026-yilda Lombardiyada bo‘lib o‘tadigan qishki Olimpiya o‘yinlariga tayyorgarlik ko‘rishda muvaffaqiyatlar tiladi.
