Tarixiy shaharlarga lyuks poyezdlar qatnovi yo‘lga qo‘yiladi
Transport vazirligida Italiya kompaniyasi vakillari bilan uchrashuv bo'lib o'tdi.
Transport vazirligida "Arsenale Group" kompaniyasi vakillari bilan uchrashuv bo'lib o'tdi.
Uchrashuvda transport sohasidagi hamkorlik masalalari hamda O'zbekistonning tarixiy shaharlarida lyuks sayyohlik poyezdini ishga tushirish bo'yicha takliflar muhokama qilindi. Kompaniya rahbariyati vagonlarni panoramali derazalar, hashamatli kabinalar va restoran vagonlari bilan jihozlashni rejalashtirayotganini ma'lum qilgan.
Qayd etilishicha, bugungi kunda bunday poyezdlar qurilish jarayonida bo’lib, 2026-yilda bunday vagonlar BAA va Saudiya Arabistonida ishga tushirilishi rejalashtirilgan.
Italiya kompaniyasi lyuks vagonlarni Toshkent – Samarqand - Buxoro – Xiva – Toshkent yo'nalishi bo'yicha ishga tushirishni taklif qildi. Kompaniya vakillari vagonlar Italiyada ishlab chiqarilishi rejalashtirilganligini ta'kidladi. Sayyohlik poyezdi jami 33 ta kabina va umumiy sig'imi 66 yo'lovchiga mo'ljallangan yuqori qulaylikka ega 12 ta lyuks vagonlardan iborat bo'lishi rejalashtirilgan.
Uchrashuv yakunida tomonlar ushbu masala bo'yicha muzokaralarni davom ettirishga kelishib oldi.
