Maхachqalʼada portlash va yong‘in: 27 kishi halok bo‘ldi
70 ga yaqin odam jabrlangan. Ular orasida ahvoli o‘ta og‘ir bemorlar ham borligi aytilmoqda.
Rossiya tarkibiga kiruvchi Dog‘iston Respublikasi poytaxti Maxachqalʼada 15 avgustga o‘tar kechasi “Globus” savdo markazi yaqinidagi avtoservis binosida kuchli portlash sodir bo‘ldi, deb xabar bermoqda shahar maʼmuriyati.
Shot Telegram kanaliga ko‘ra, portlashdan so‘ng yong‘in boshlangan va olov yonilg‘i quyish shoxobchasiga ham o‘tgan. Shu bilan birga, Dog‘iston rahbari Sergey Melikov portlash dastlab Maxachqalʼa chekkasidagi yonilg‘i quyish shoxobchalaridan birida sodir bo‘lgani haqida yozdi.
So‘nggi maʼlumotlarga ko‘ra, portlash oqibatida 27 kishi halok bo‘lgan, ulardan uch nafari bolalar. Baza Telegram kanali voqea oqibatida 50 dan ortiq kishi jarohatlanganini yozdi, Shot maʼlumotlarida yaradorlar 70 ga yaqin odam ekani aytildi.
Mash kanali xabariga ko‘ra, yonilg‘i quyish shoxobchasidan chiqqan yong‘in yaqin atrofdagi uylarga ham o‘tgan. Aholi zudlik bilan evakuatsiya qilingan.
Hozirgi vaqtga kelib yong‘in o‘chirilgan, Rossiya Favqulodda vaziyatlar vazirligi voqea joyida hududni tozalash ishlarini olib bormoqda.
Mahalliy hokimiyat maʼlumotlariga ko‘ra, jabrlanganlarning bir qismi keyin boshqa tibbiyot muassasalariga o‘tkazilgan. Favqulodda vaziyatlar vazirligi ahvoli o‘ta og‘ir bemorlarni Moskvaga olib borish uchun Maхachqalʼaga maxsus samolyot yubordi.
Dog‘iston prokuraturasi hodisa yuzasidan tekshiruv boshlagan, portlash yuz bergan tumanda gaz taʼminoti uzib qo‘yilgan. Melikov portlashda halok bo‘lganlar va jarohatlanganlarning oilalariga tovon puli to‘lashga vaʼda berdi.
