Terrorchilik tashkilotiga qo‘shilgan o‘zbekistonlik yigit qidiruvga berildi
U 15 yoshida onasi bilan xorijga chiqib ketgan.
Onasi bilan 15 yoshida Toshkentdan xorijga chiqib ketgan o‘smir xalqaro terrorchilik tashkiloti safiga qo‘shilgani uchun jinoyat ishi qo‘zg‘atilib, qidiruvga berildi. Bu haqda poytaxt IIBB matbuot xizmati xabar qildi.
Maʼlum qilinishicha, 2000 yilda Toshkent shahrida tug‘ilgan SH.X. 15 yoshida onasi va ikki nafar singlisi bilan aylanma yo‘llar orqali, yaʼni Qozog‘iston, Rossiya, Ukrainadan o‘tib, Misrga borgan. O‘sha yilning sentyabrida u Misrdan Turkiya orqali Suriyaga o‘tadi.
SH.X. jangovar harakatlarda qatnashish maqsadida ISHID safiga borib qo‘shilgan. Huquq-tartibot idoralari tomonidan unga nisbatan Jinoyat kodeksining 244-2-moddasi (Diniy ekstremistik, separatistik, fundamentalistik yoki boshqa taqiqlangan tashkilotlar tuzish, ularga rahbarlik qilish, ularda ishtirok etish) bilan jinoyat ishi qo‘zg‘atilgan va qidiruv eʼlon qilingan.
Bundan avval xalqaro terrorchilik tashkiloti saflariga qo‘shilgan o‘zbekistonlik erkak va uning o‘g‘li qidiruvga berilgani xabar qilingandi. Shuningdek, qizlari bilan xalqaro terrorchilik tashkiloti jangarilari aʼzosi bo‘lgan o‘zbekistonlik ayol ham qidirilmoqda. Ushbu ayol ham Rossiyada yashovchi erkak bilan tanishib, ikki qizi bilan dastlab Ozarbayjon orqali Turkiyaga, u yerdan esa Suriyaga borgan va xalqaro terrorchilik tashkilotining jangarilariga borib qo‘shilgan.
Maʼlumot uchun: ISHID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
