“Antistrumin” xarid qilgan MCHJ SSV taʼsisligida bo‘lgan
Dori vositasini xarid qilish uchun hech qanday tender o‘tkazilmagani aytilmoqda.
Sog‘liqni saqlash vazirligi taʼsischiligidagi “O‘ZMEDIMPEKS” MCHJ kaliy yodid 1 mg (0,001 g) №100 (Antistrumin) dori vositasini xarid qilish uchun 2022 yil iyun oyida “Samo” MCHJ bilan 5 mlrd 644 mln so‘mlik to‘g‘ridan-to‘g‘ri shartnoma tuzgan. 2023 yil 11 yanvarda esa ushbu shartnomaga 956 mln so‘mlik qo‘shimcha kelishuv qilingan.
“O‘ZMEDIMPEKS” MCHJ 2023 yil 4 mayda yana antistrumin dori vositasini xarid qilish uchun “Samo” MCHJ bilan 15 mlrd 275 mln so‘mlik to‘g‘ridan-to‘g‘ri shartnoma tuzgan. Ushbu shartnomalarga ko‘ra, jami 21 mlrd 875 mln so‘m mablag‘ evaziga “Samo” MCHJ 3 mln 550 ming miqdorda antistrumin yetkazib berishi ko‘rsatilgan.
Maʼlumot uchun, antistrumin dori vositasini xarid qilish uchun hech qanday tender o‘tkazilmagan, shartnomalar to‘g‘ridan-to‘g‘ri tuzilgan. “Samo” MCHJ taʼsischilaridan biri
Nodir Yunusov AQSH bojxona va immigratsiya nazorati xizmati tomonidan qidiruvga berilgani haqida xabarlar tarqaldi. U odam savdosi va firibgarlikda ayblangan. Nodir Yunusov, shuningdek, “Zuma-Pharma” MCHJ rahbari ham sanaladi.
Davlat xaridlari portalida “O‘ZMEDIMPEKS” MCHJ “Zuma-Pharma” MCHJ bilan ham tuzgan shartnomalar haqida maʼlumot bor. Jumladan, 7000 dona shpris-ruchka eritropoetin vositasini yetkazib berish bo‘yicha 782 mln so‘mlik to‘g‘ridan-to‘g‘ri shartnoma tuzilgan.
Sog‘liqni saqlash vaziri o‘rinbosari bolalar ovqatdan ham, doridan ham zaharlanmaganligini aytdi.
