"Misli ko‘rilmagan shafqatsizlik": G‘azodagi shifoxona portlatildi

 

G‘azo sektoridagi "Al-Ahliy al-Maʼdaniy" baptistlar shifoxonasiga Isroil tomonidan raketa zarbasi berildi. So‘nggi maʼlumotlarga ko‘ra, 800 nafardan ziyod odam halok bo‘lgan, ularning orasida yuzlab bolalar bor.

 

G‘azo sog‘liqni saqlash vazirligi shifoxonada halok bo‘lganlarning barchasi tinch aholi vakillari bo‘lganini qayd etdi.

 

Isroil tomoni zarba uchun javobgarlikni o‘z zimmasiga olmayapti.

 

Ekspertlar kasalxonaga Amerikada ishlab chiqarilgan JDAM raketasi bilan zarba berilganini aniqlashgan. Eslatib o‘tamiz, yaqinda AQSH Isroilga shu turdagi raketalarni yetkazib bergandi.

 

Falastin prezidenti Mahmud Abbos shifoxonada halok bo‘lgan qurbonlar xotirasiga mamlakatda uch kunlik motam eʼlon qildi.

 

Dunyo hamjamiyati Isroilning qilmishiga qanday munosabat bildirmoqda?

 

Turkiya prezidenti Rajab Toyyib Erdo‘g‘an G‘azodagi hospitalga Isroil tomonidan aviazarba berilganidan so‘ng jahon hamjamiyatini Falastin anklavidagi "misli ko‘rilmagan shafqatsizlik"ni tugatishga chaqirdi.

 

"Ayollar, bolalar va hech narsada aybsiz bo‘lgan tinch aholi vakillari bo‘lgan kasalxonaga zarba berish — bu Isroilning elementar insoniy qadriyatlardan xoli bo‘lgan hujumlarining namunasidir.

 

Men butun insoniyatni G‘azo sektoridagi bu misli ko‘rilmagan shafqatsizlikni to‘xtatishga chaqiraman", — deb yozdi Erdo‘g‘an X (sobiq Twitter) ijtimoiy tarmog‘ida.

 

AQSH Isroilni "urush qonunlari"ga rioya qilishga chaqiradi — Pentagon G‘azo sektoridagi hospitalga Isroil aviazarbasi to‘g‘risidagi xabarlarga munosabat bildirdi.

 

Misr tashqi ishlar vazirligi: "Biz Isroil tomonidan G‘azo sektoridagi Al-Ahliy baptistlar hospitalining bombardimon qilinishini keskin qoralaymiz".

 

Saudiya Arabistoni Tashqi ishlar vazirligi: "G‘azodagi shifoxonani portlatish — og‘ir jinoyatdir".

 

Iordaniya qiroli G‘azodagi kasalxona portlashini “qirg‘in” va "harbiy jinoyat" deb atadi.

 

Jahon sog‘liqni saqlash tashkiloti G‘azo sektoridagi kasalxonaga hujumni qatʼiy qoralaydi, shuningdek, tinch aholi va tibbiyot muassasalarini himoyalashning zarur choralarini ko‘rishga chaqiradi — JSST bosh direktori Tedros Adanom Gebreyesus.

 

Rossiya va BAA G‘azodagi shifoxonaga berilgan zarba tufayli 18-oktabr kuni  BMT Xavfsizlik Kengashining shoshilinch yig‘ilishini o‘tkazishni so‘rashdi.

 

Dunyo bo‘ylab ommaviy namoyishlar bo‘lmoqda

 

Mudhish fojia turli davlatlarda yashayotgan musulmonlarni junbishga keltirdi. Ular Isroilning jinoyatkorona harakatlarini qoralab, ko‘chalarga namoyishga chiqishdi. Jumladan, Iordaniya poytaxti Ammon shahrida Isroil elchixonasiga o‘t qo‘yilgani aytilmoqda. Istanbul shahridagi Isroil konsulligi binosi oldida ham ko‘p ming kishilik norozilik namoyishi o‘tkazildi.

 

G‘azodagi fojia tufayli Eron, Iroq, Livan va bir qator arab davlatlarida 18 oktabr motam kuni deb eʼlon qilinadi.