Evander Xolifilddan Otabek Umarovgacha: boks afsonalari Toshkentda jam bo‘ldi — fotojamlanma
Poytaxtimiz Butunjahon boks ittifoqi (WBC)ning 61-konvensiyasiga mezbonlik qilmoqda.
Bugun kurayi zaminimizning yuzdan ziyod davlati vakillari, dunyoga mashhur bokschilar, taniqli promouterlar, bir so‘z bilan aytganda jahon professional boks ommasi qatnashayotgan Konvensiyaning tantanali ochilish marosimi bo‘lib o‘tdi.
Unda O‘zbekiston Respublikasi Bosh vaziri o‘rinbosari Achilboy Ramatov, Osiyo Olimpiya kengashi vitse-prezidenti Otabek Umarov, Yoshlar siyosati va sport vaziri Adham Ikramov, O‘zbekiston kasaba uyushmalari federatsiyasi hamda mamlakat professional boks federatsiyasi vasiylik kengashi raisi Qudratilla Rafiqov, federatsiya raisining birinchi o‘rinbosari G‘ofur Rahimov, WBC prezidenti Maurisio Suleyman va boshqa rasmiylar ishtirok etdi. Achilbay Ramatov tadbir avvalida so‘z olib, mamlakatimizda Prezidentimiz tomonidan sog‘lom turmush tarzi, xususan, sportga qaratilayotgan ulkan eʼtibor xususida to‘xtaldi. Bokschilarimizning xalqaro maydonda qayd etayotgan yutuqlarini alohida eʼtirof etdi va tadbirni rasman ochiq deb eʼlon qildi. O‘z o‘rnida, Maurisio Suleyman mamlakatimiz ushbu yirik sport tadbiriga yuqori saviyada hozirlik ko‘rgani, professional bokschilarimizning jahon ringlarida aytishga arzigulik g‘alabalarga erishayotgani haqida gapirdi.
Ochilish marosimida O‘zbekiston professional boks federatsiyasi tomonidan o‘tgan davr mobaynida amalga oshirilgan keng ko‘lamli ishlar sarhisobiga bag‘ishlangan videolavha namoyish etildi. Shuningdek, WBC tarixiga oid hujjatli film ko‘pchilikning diqqat markazida bo‘ldi. G‘ofur Rahimov WBC oliy ijroiya qo‘mitasi aʼzoligiga qabul qilindi.
Tadbirda WBC prezidenti A.Ramatov va G‘.Rahimovga uzoq yillik hamkorlik hamda mazkur konvensiyani yuqori saviyada tashkil etishdagi yordami uchun tashkilotning esdalik sovg‘alarini taqdim qildi. Shuningdek, o‘zbek boksi yulduzlariga ham maxsus medallar topshirildi.
