Shohjahon Ergashev: 25-noyabr kuni tarixga kiraman!
Bokschi raqibi Sabriel Matiasga qarshi jangi haqida gapirdi.
Professional bokschimiz Shohjahon Ergashev (23 (20 KO)-0) 25-noyabr kuni Las-Vegas (AQSH)da bo‘lib o‘tadigan yarim o‘rta vazn toifasida IBF chempioni Sabriel Matiasga qarshi jangi haqida gapirdi.
"Jahon chempionlik kamariga jang qilish imkoniyatini qo‘lga kiritish uchun uzoq yo‘l yurdim. 25 noyabr kuni bu sayohatni behuda emasligini namoyish etmoqchiman. Murabbiylarim Shugar Xill Styuard va Teo Chembers yordamida tarixga kiraman va O‘zbekiston yana bir jahon chempioniga ega bo‘ladi", — dedi Ergashev.
Maʼlumot uchun, 31 yoshli Ergashev so‘nggi bor 2022-yilning avgustida Anxel Martines Ernandesga qarshi ringga chiqqan edi. O‘sha jangda Shohjaxon texnik nokaut evaziga g‘alaba qozongandi. Bokschimiz hisobida 23 g‘alaba (20 tasi nokaut) bor.
31 yoshli Matias esa shu yilning fevral oyida Xeremias Ponsega qarshi jang qilgan. Ushbu qarama-qarshilikda Sabriel muddatidan avval g‘alaba qozonib, IBF chempionlik kamarini qo‘lga kiritgandi. Uning hisobida 19 g‘alaba (barchasi nokaut bilan) va bitta mag‘lubiyat bor.
