Makkada 1-o‘zbek milliy taomlari restorani ochilmoqda
Restoranning ochilish marosimi 28-noyabr kuni bo‘lib o‘tadi.
O‘zbekistonning Jiddadagi Bosh konsulligida Saudiya Arabistonida tadbirkorlik bilan shug‘ullanayotgan fuqaro Xayrullo Ikromov bilan uchrashuv bo‘lib o‘tdi.
Muloqotda O‘zbekistonda ijtimoiy-iqtisodiy sohada amalga oshirilayotgan islohotlar, xorijda yashayotgan vatandoshlar bilan munosabatlarni mustahkamlash, investitsiyaviy va sayyohlik muhitining jozibadorligini oshirish bo‘yicha qilinayotgan ishlar haqida batafsil maʼlumot berildi.
O‘z navbatida, Xayrullo Ikromov O‘zbekistonda kechayotgan yangiliklarni doim kuzatib borishini, jumladan, ilm-fan, madaniyat va sport sohalarida erishilgan yuksak natijalar bilan faxrlanishini taʼkidladi.
«Xorijda uzoq yillardan beri restoran biznesi bilan shug‘ullanib kelaman. Makkada o‘zbek milliy taomlariga bo‘lgan ehtiyojdan kelib chiqib, ushbu shaharning markaziy qismida yangi tamaddixona ochyapmiz. Ushbu restoranga “O‘zbekiston” deb nom qo‘ydik», dedi u.
Yangi tashkil etilayotgan restoranga bosh oshpaz, nonvoy va boshqa xodimlarni O‘zbekistondan jalb etishga kelishib olindi.
Makka shahridagi “O‘zbekiston” birinchi milliy taomlar restoranining rasmiy ochilish marosimi 28 noyabr kuni bo‘lib o‘tadi.
