Chirchiq IIBda 22 yoshli yigit o‘zini osib qo‘ydi
U 10 kun davomida tergov hibsxonasiga saqlangan.
Toshkent viloyati Chirchiq shahar Ichki ishlar boshqarmasi tergov hibsxonasidan 2001-yilda tug‘ilgan yigit o‘zini osgan holda topildi. Bu haqda o‘z manbasiga tayanib, “Qalampir” nashri xabar berdi.
Maʼlumotlarga ko‘ra, yigit joriy yilning 20-noyabr kuni o‘g‘irlik jinoyatida gumonlanib qamoqqa olingan. U 1-dekabr kuni soat 02:30 larda hibsxonada o‘zini osgan holda topilgan.
Yigitning o‘z joniga qasd qilishiga nima sabab bo‘lgani hozircha maʼlum emas. Hibsxona kamerasidagi tasvirlarga ko‘ra, yigit o‘zini choyshabga osgan.
Bundan tashqari, yigitning burni singani va tanasida jarohatlar borligi aniqlangan. Shundan so‘ng yigitning ota-onasi o‘g‘lining jasadini ko‘mishga ruxsat bermagan va ekspertiza o‘tkazilishini talab qilmoqda.
