Og‘ir atletika bo‘yicha Ruslan Nuriddinov sport markazi tashkil etiladi
Bu bo‘yicha Prezident qarori loyihasi eʼlon qilindi.
Prezidentning “Og‘ir atletika sport turini yana-da rivojlantirish chora-tadbirlari to‘g‘risida”gi qarori loyihasi eʼlon qilindi.
Loyiha bilan:
og‘ir atletika sport turini rivojlantirishning asosiy yo‘nalishlari;
og‘ir atletika bo‘yicha barcha yosh toifasidagi terma jamoalar aʼzolari bilan individual ishlash tizimini yaratish hamda ular professional tayyorgarligini tashkil etish uchun davlat byudjetidan moliyalashtiriladigan og‘ir atletika bo‘yicha Ruslan Nuriddinov sport markazini tashkil etish;
2025-2026-o‘quv yilidan boshlab davlat sport taʼlim muassasalarida og‘ir atletika bo‘yicha davlat buyurtmasi parametrlarini oshirish;
og‘ir atletikaga ixtisoslashgan hududlarda ayollar og‘ir atletikasini rivojlantirish yuzasidan alohida dasturlarni qabul qilish hamda mahalliy byudjet va homiylar mablag‘lari hisobidan bosqichma-bosqich zamonaviy infratuzilma va jihozlar bilan taʼminlangan og‘ir atletika bazalarini barpo etish;
og‘ir atletika bo‘yicha Ruslan Nuriddinov sport markazini Toshkent viloyati, Chirchiq shahri, Talabalar ko‘chasi, 10-uy manzilida joylashgan Yoshlar siyosati va sport vazirligi tasarrufidagi bino-inshootlarga operativ boshqaruv huquqiy asosida joylashtirish;
og‘ir atletika sport turini 2023-2026 yillarda kengroq rivojlantirish dasturini hamda 2023-2026 yillarda og‘ir atletika sport turini rivojlantirishning maqsadli ko‘rsatkichlarini tasdiqlash;
2024 yildan boshlab har yili anʼanaviy tarzda:
og‘ir atletika bo‘yicha xotin-qizlar o‘rtasida “Markaziy Osiyo ochiq chempionati”;
og‘ir atletika va para pauerlifting bo‘yicha nufuzli Uzbekistan Open xalqaro turniri;
og‘ir atletika bo‘yicha Xalqaro og‘ir atletika federatsiyasining tasdiqlangan norma va qoidalarida belgilangan yosh toifalari bo‘yicha uch bosqichli (tuman/shahar, hududiy va respublika) chempionatlar va kuboklar;
og‘ir atletika bo‘yicha davlat sport taʼlim muassasalari o‘rtasida “O‘zbekiston chempionati” musobaqasini o‘tkazish;
faoliyati davomida namuna ko‘rsatgan yuqori malakaga ega trener va mutaxassislar malakasini yana-da oshirish, zamonaviy bilim hamda ko‘nikmalarga ega bo‘lishlarini taʼminlash uchun ularni milliy terma jamoalarning xorijda o‘tkaziladigan o‘quv-yig‘in mashg‘ulotlari va xalqaro musobaqalar jarayoniga jalb etish belgilanmoqda.
