Turkiy davlatlar bojxona xizmatlari rahbarlari Toshkentda yig‘ildi

 

Avvalo, taʼkidlash joizki, mazkur nufuzli xalqaro tadbirda tashkilotga aʼzo Ozarbayjon, Qozog‘iston, Qirg‘iziston, Turkiya va O‘zbekiston hamda kuzatuvchi davlat - Vengriya bojxona xizmati rahbarlari, Turkiy davlatlar tashkiloti kotibiyati ishtirok etdi. Shuningdek, Gruziya bojxona xizmati rahbari faxriy mehmon sifatida ishtirok etdi.

 

Mehmonlar dastlab Bojxona qo‘mitasining zamonaviy Bojxona rasmiylashtiruvi markazi va Markaziy bojxona laboratoriyasi bilan tanishib, mamlakatimizda bojxona sohani raqamlashtirish yo‘nalishida erishilgan eng ilg‘or yutuqlarni eʼtirof etishdi.

 

Poytaxtimizdagi Simpoziumlar saroyida o‘tkazilgan Turkiy davlatlar tashkilotiga aʼzo davlatlar bojxona xizmatlari rahbarlarining 9-yig‘ilishi asosiy eʼtibor tashkilotning 2022 yildagi Samarqand sammitida imzolangan Turkiy davlatlar o‘rtasida Soddalashtirilgan bojxona yo‘lagini joriy etish to‘g‘risida Bitimni hayotga tatbiq etishga qaratildi.

 

Shuningdek, Turkiy davlatlar tashkiloti hududida yagona tranzit tarmog‘ini shakllantirish masalasi ham ko‘rib chiqildi. Bunda TIR Konvensiyasining elektron tartiboti - eTIR xalqaro tizimini tashkilot hududida to‘liq qamrab olish muhim. Bu esa eng avvalo tashkilotga aʼzo davlatlar o‘rtasida o‘zaro tovar aylanmasi hajmini oshirish, ushbu jarayonda sarflanadigan vaqt va moliyaviy xarajatlarni qisqartirishda muhim ahamiyat kasb etadi.

 

Ushbu xalqaro tizimga Ozarbayjon, O‘zbekiston va Gruziya qo‘shilgan bo‘lib, 2022 yil dekabr oyida dunyoda ilk bor Ozarbayjon va O‘zbekiston birinchi eTIR tashuvini amalga oshirgan.

 

Yig‘ilishda Bojxona qo‘mitasi Raisi Akmalxo‘ja Mavlonov eTIR tashuvlari bo‘yicha mintaqaviy o‘zaro hamkorlikka xizmat qiluvchi Ekspertlar ishchi guruhini tashkil etish taklifini ilgari surdi.