O‘zbekistonda ilk bor parkinsonga chalingan bemor operatsiya qilindi
63 yoshli bemorning bosh qismiga “chip” o‘rnatish orqali operatsiya muvaffaqiyatli amalga oshirildi.
Parkinson kasalligi hozirgi zamon neyroxirurgiya va nevrologiyasining eng dolzarb muammolaridan biri bo‘lib, dunyoda har 1000 ta odamdan 1-3 tasida (0,1-0,3%) kuzatiladi. O‘zbekistonda ham ushbu kasallik bilan kasallanganlar soni so‘ngi vaqtlarda ortib bormoqda.
2023 yil 26 dekabr kuni Samarqand davlat tibbiyot universiteti qoshidagi Neyroxirurgiya va neyroreabilitatsiya ilmiy-amaliy markazida Turkiyaning Medisal Park klinikasi professori Said O‘zturk ishtirokida mamlakatda birinchi marta yangi jarrohlik davolash usuli yo‘lga qo‘yildi.
SamDTU huzuridagi Neyroxirurgiya va neyroreabilitatsiya markazida Parkinson kasalligini xirurgik davolashda 5 yildan beri ushbu kasallik bilan og‘rib kelayotgan 63 yoshli bemorning bosh qismiga “chip” o‘rnatish orqali operatsiya muvaffaqiyatli amalga oshirildi.
