Rossiyada halok bo‘lgan vatandoshlarimiz jasadi olib kelindi
FVV holat yuzasidan ma’lumot berdi.
Rossiyaning Penza viloyatida halok bo‘lgan sakkiz nafar o‘zbekistonlikning jasadi olib kelindi. Bu haqda Favqulodda vaziyatlar vazirligi xabar berdi.
Prezident Mirziyoyevning topshirig‘iga asosan Hukumat farmoyishi bilan Favqulodda vaziyatlar vazirining birinchi o‘rinbosari boshchiligida tashkil etilgan ishchi guruh kecha, 12 yanvar kuni Penza viloyatiga yetib borib, Rossiya Federatsiyasining mas’ul idoralari rahbarlari bilan uchrashgan. Shundan so‘ng maxsus bort Rossiya Federatsiyasidan uchib, 13 yanvar kuni soat 06:50 larda Xorazm viloyatidagi “Urganch” xalqaro aeroportga kelib qo‘ndi.
Jarohatlangan fuqarolarning 1 nafari 12 yanvar kuni tonggi vaqtda Penza shahridagi shifoxonada shifokorlarning muolajalariga qaramasdan vafot etgan.
Favqulodda vaziyatlar, Ichki ishlar, Tashqi ishlar, Sog‘liqni saqlash va Transport vazirliklari hamkorligida 8 nafar vafot etgan fuqarolarning jasadlari yashash manzillariga yuborildi. Hozirda mahalliy hokimliklar tomonidan dafn marosimlarini o‘tkazish yuzasidan tayyorgarlik ishlari olib borilmoqda.
Jarohatlangan yana 1 nafar fuqaro Penza shahridagi kasalxonada, davolanish ishlari yakuniga yetgandan so‘ng O‘zbekiston Respublikasiga qaytariladi. Hozirgi vaqtda kasalxonaga joylashtirilgan fuqaro shifokorlarning qat’iy nazoratiga olinib, tegishli muolajalar o‘tkazilmoqda.
