Tadbirkor va talaba fuqarolarning 100 mln so‘mga yaqin pulini o‘zlashtirdi

 

Farg‘onada tadbirkor va Turin politexnika universiteti talabasi soxta ilova yaratib, fuqarolarning 100 mln so‘mga yaqin pulini o‘zlashtirdi. Ular go‘yo fuqarolarning plastik kartasidagi pulni birjada kriptovalyutaga almashtirgan holda talon-toroj qilgan.

 

Farg‘onada soxta ilova yaratib, fuqarolarning 100 million so‘mga yaqin pulini o‘zlashtirganlarga sud hukmi o‘qildi. Ma’lum bo‘lishicha, Toshkent shahrida yashovchi tadbirkor Sh.Sh. hamda Turin politexnika universiteti talabasi A.Yu. ham axborot tizimi orqali odamlarni chuv tushirish rejasini tuzgan.

 

Ular internet ijtimoiy tarmog‘idan foydalanib, «Agrobank mobile» zararli ilovasini yaratgan. Mazkur ilova orqali fuqarolarning plastik kartasidan erkin foydalanish imkoniyatiga ega bo‘lgan. Dastur yordamida fuqaro A.N.ning plastik kartasidagi 47 million 235 ming so‘m miqdoridagi pul mablag‘ini birjada kriptovalyutaga almashtirgan holda talon-toroj qilgan.

 

Bundan tashqari, fuqaro O.J.ning kartasidagi 45 million 225 ming so‘m so‘m miqdoridagi pul mablag‘larini ham kriptovalyutaga almashtirgan holda o‘zlashtirib olgan. Farg‘ona viloyat IIB kiberxavfsizlik bo‘limi xodimlari tomonidan mazkur holatlar bo‘yicha tezkor texnik tadbirlar o‘tkazilib, ularning harakatlariga aniqlik kiritildi. Sudlanuvchilarga sud hukmi bilan 5 yil muddatga ozodlikdan mahrum etish jazosi tayinlandi.