Nig‘matulla Yo‘ldoshev Bosh prokuror lavozimiga tayinlandi
Bugun Senatda ushbu masala ko‘rib chiqildi.
Bugun, 21 iyun kuni Senatning ellik uchinchi yalpi majlisi bo‘lib o‘tdi. Unda O‘zbekiston Respublikasi Bosh prokurori lavozimiga nomzod haqidagi masala ko‘rib chiqildi va Nig‘matilla Yo‘ldoshev Bosh prokuror lavozimiga tasdiqlandi.
Maʼlumot uchun, Nig‘matulla Yo‘ldoshev bu lavozimda 2019 yil iyulidan buyon ishlab kelmoqda. U ikkinchi muddatga Bosh prokuror lavozimini egalladi.
Nig‘matulla Yo‘ldoshev 1962 yilda Toshkent shahrida tug‘ilgan, Toshkent davlat yuridik institutini tamomlagan.
U 1987 yildan 2011 yilgacha prokuratura tizimida turli lavozimlarda ishlagan. 2011 yilda O‘zbekiston Adliya vaziri lavozimiga tayinlangan va bu lavozimda 2015 yil yanvariga qadar ishlagan.
Nig‘matulla Yo‘ldoshev 2015 yil yanvarida prezident qarori bilan senator etib tayinlangan, 2015 yilning 22 yanvarida yashirin ovoz berish yo‘li bilan Senat raisi lavozimini egallagandi.
