O‘zbekistonda yoshga doir pensiyalar avtomatik tarzda tayinlanadi
Bu haqida Pensiya jamg‘armasi matbuot xizmati xabar berdi.
Respublikada 2025-yil 1-martdan boshlab yoshga doir pensiyalar fuqarolarning murojaatisiz tayinlanadi. Bu haqda Pensiya jamg‘armasi matbuot xizmati xabar berdi.
Qayd etilishicha, Pensiya ta’minoti tizimiga axborot texnologiyalarini faol joriy qilish orqali fuqarolarga ko‘rsatilayotgan xizmatlar bosqichma-bosqich interaktiv va proaktiv shaklga o‘tkazilmoqda.
Xususan, 2025-yil 1-martdan boshlab pensiya yoshiga yetgan fuqarolarga pensiyalar avtomatik tarzda, ya’ni hech qanday hujjat talab etmagan holda va fuqaroning murojaatisiz tayinlanadi. Shuningdek, fuqaroning shaxsiga oid barcha ma’lumotlar vazirlik va idoralarning elektron bazalaridan olinadi.
Ushbu qulayliklarning yo‘lga qo‘yilishi natijasida fuqarolardan pensiya tayinlash uchun Pensiya jamg‘armasining hududiy bo‘linmasiga murojaat qilish talab etilmaydi. Bundan tashqari, Pensiya yoshiga yetgan fuqaroga qonunchilikda belgilangan talablar doirasida pensiya tayinlash haqida qaror qabul qilinganida uning telefon raqamiga "pensiya tayinlanganligi va uning miqdori" to‘g‘risida ma’lumot yuboriladi.
Pensiyaga chiqmasdan ish faoliyatini davom ettirish istagida bo‘lgan yoki pensiya miqdoridan norozi bo‘lgan fuqarolarga esa "avtomatik" tayinlangan pensiyani rad etish huquqi berilmoqda. Fuqaro pensiya tayinlanganidan, pensiya miqdoridan yoki pensiya tayinlanishi rad etilganidan norozi bo‘lgan taqdirda Pensiya jamg‘armasining tuman (shahar) bo‘limiga tegishli tartibda ariza bilan murojaat qilishlari mumkin.
