Ko‘mir qachon va qayerdan sotiladi? “O‘zbekko‘mir” rasmiy ma’lumot berdi
Ayni paytda hududlarga ko‘mirni taqsimlash va birja savdolariga chiqarish ishlari bosqichma-bosqich amalga oshirilmoqda.
2026-yilda aholi ehtiyojlari uchun 1 mln 530 ming tonna mahalliy ko‘mir yetkazib berilishi rejalashtirilmoqda. Bu haqda “O‘zbekko‘mir” AJ axborot xizmati ma’lum qildi.
Hozirda ko‘mirni hududlar kesimida taqsimlash va birja savdolariga chiqarish ishlari bosqichma-bosqich amalga oshirilmoqda. Andijon, Farg‘ona va Namangan viloyatlari uchun ko‘mirning dastlabki partiyalari xususiy tadbirkorlar tomonidan birja orqali xarid qilingan.
Ayni paytda shartnomalarni rasmiylashtirish hamda ko‘mirni tegishli hududlarga yetkazib berish ishlari davom etmoqda. Mahsulot mahalliy omborlarga yetkazilgach, uning aholiga sotilishi mycoal.uz elektron platformasi orqali tashkil etiladi.
Platformada ko‘mir savdosi boshlanadigan sana, ombor manzili va mavjud mahsulot miqdori hududlar kesimida e’lon qilib boriladi.
Shuningdek, hududlarda ko‘mirga ehtiyojmand xonadonlar ro‘yxatini shakllantirish ishlari davom etmoqda.
“O‘zbekko‘mir” aholiga ko‘mir sotilishi bo‘yicha ma’lumotlarni faqat korxonaning rasmiy axborot manbalari hamda mycoal.uz platformasidan olishni tavsiya qildi.
