Qabul-2026: imtihondan “yiqilgan” qoraqalpog‘istonlik abituriyentlar uchun qo‘shimcha o‘rinlar ajratildi
Qoraqalpog‘istonda doimiy yashaydigan yoshlar uchun 2026/2027-o‘quv yilida oliy ta’limga qo‘shimcha 500 ta maqsadli va 6 500 ta to‘lov-kontrakt asosidagi qabul parametrlari tasdiqlandi.
2026/2027-o‘quv yili uchun Qoraqalpog‘istonda doimiy yashaydigan yoshlarga oliy ta’limga kirishda ikkita qo‘shimcha imkoniyat berildi.
Davlat komissiyasining tegishli bayoniga ko‘ra, 2–6-oktyabr kunlari kirish imtihonlarida 68 va undan yuqori ball to‘plab, davlat oliy ta’lim tashkilotlarining kunduzgi ta’lim shakliga to‘lov-kontrakt asosida talabalikka tavsiya etilgan yoshlar 500 ta maqsadli qabul parametri uchun tanlovda ishtirok etishi mumkin.
Buning uchun Qoraqalpog‘iston Respublikasida doimiy yashaydigan, umumiy o‘rta, o‘rta maxsus yoki kasbiy ta’lim tashkilotini tamomlagan abituriyentlar 2–6-oktyabr kunlari my.uzbmb.uz orqali ro‘yxatdan o‘tadi. Tanlov abituriyent talabalikka tavsiya etilgan oliy ta’lim tashkiloti va ta’lim yo‘nalishi bo‘yicha o‘tkaziladi.
Maqsadli qabulga tavsiya etishda abituriyentlarning kirish imtihonlarida to‘plagan ballari ketma-ketligi asos qilib olinadi.
Bundan tashqari, Qoraqalpog‘iston Respublikasida doimiy yashaydigan va kirish imtihonlarida 56,7 va undan yuqori ball to‘plagan, biroq talabalikka tavsiya etilmagan abituriyentlar uchun viloyatlardagi davlat oliy ta’lim tashkilotlarining bakalavriat yo‘nalishlariga 6 500 ta qo‘shimcha qabul parametri ajratildi.
Mazkur qo‘shimcha qabul bazaviy to‘lov-kontrakt asosida amalga oshiriladi. Tanlov tegishli bakalavriat ta’lim yo‘nalishlari kesimida o‘tkaziladi.
Tanlov qaydnomalari 2026-yil 10-oktabrgacha tegishli oliy ta’lim tashkilotlariga yetkaziladi.
