Shavkat Mirziyoyev O‘zbekiston o‘qituvchi va murabbiylarini tabrikladi
Tabrikda ta’lim sohasidagi yutuqlar qayd etilib, ilg‘or pedagoglar uchun Abdulla Avloniy nomidagi davlat mukofoti ta’sis etilishi ma’lum qilindi.
O‘zbekiston Prezidenti Shavkat Mirziyoyev 1-oktyabr — O‘qituvchi va murabbiylar kuni munosabati bilan mamlakat pedagoglarini tabrikladi.
Prezident o‘z tabrigida ta’lim sohasida so‘nggi yillarda amalga oshirilgan islohotlar natijalarini qayd etdi. Ta’kidlanishicha, hozirda mamlakatdagi 40 ming nafar o‘qituvchi 1 ming dollardan, 1,5 ming nafari esa 2 ming dollardan ortiq maosh olmoqda.
Shuningdek, joriy yilda yangi formatda o‘tkazilgan “Yil o‘qituvchisi” tanlovining 208 nafar tuman va shahar bosqichi g‘oliblariga jami 616 million so‘mdan mukofot berilgan. Mazkur rag‘batlantirish mexanizmlarini kelgusi yildan bog‘cha tarbiyachilari va texnikum ustalariga ham joriy etish rejalashtirilgan.
Qayd etilishicha, so‘nggi o‘n yilda mamlakatda 1,8 million o‘rinli bog‘cha va 1,5 million o‘rinli maktablar barpo etilgan, 10 mingdan ziyod bog‘cha va maktab zamonaviylashtirilgan. Oliy ta’lim muassasalari soni esa 77 tadan 205 taga yetgan, oliy ta’lim bilan qamrov 45 foizga oshgan.
Prezident xalqaro ta’lim va fan musobaqalaridagi natijalarga ham to‘xtaldi. 2026-yilda O‘zbekiston o‘quvchilari xalqaro olimpiadalarda 228 ta medalni qo‘lga kiritgan. Bu yil xorijiy til va fan sertifikatiga ega o‘quvchilar soni 100 ming nafarga yetgan, qariyb 5 ming nafar maktab bitiruvchisi oliygohlarga kirishda eng yuqori ball to‘plagan.
Shuningdek, O‘zbekistonning 15 yoshli o‘quvchilari PISA xalqaro tadqiqotida tabiiy fanlarni o‘zlashtirish bo‘yicha 32 pog‘onaga ko‘tarilib, 48-o‘rinni egallagani qayd etilgan.
Tabrikda kelgusi o‘n yil mamlakat uchun milliy yuksalish davri sifatida belgilanganini ta’kidlab, ta’lim-tarbiya tizimini rivojlantirish bo‘yicha yangi vazifalar belgilandi.
Jumladan, ilg‘or pedagoglarni rag‘batlantirish maqsadida Abdulla Avloniy nomidagi davlat mukofotini ta’sis etish to‘g‘risida qaror qabul qilingani ma’lum qilindi.
Prezident barcha ustoz va murabbiylarni bayram bilan yana bir bor tabriklab, ularga mustahkam sog‘liq, oilaviy baxt-saodat va faoliyatida muvaffaqiyat tiladi.
