Dunyoda shakar taqchilligi xavfi kuchaymoqda: narxlar 25 foizdan ko‘proqqa oshdi
El-Nino shakar bozoriga eng kuchli ta’sir ko‘rsatuvchi tabiiy hodisalardan biri hisoblanadi.
Dunyoda shakar taqchilligi xavfi kuchaymoqda. Bunga Janubiy yarimsharning ayrim hududlarida yog‘ingarchilikning ko‘payishi, ekvatordan shimolda esa qurg‘oqchilik kuzatilayotgani sabab bo‘lmoqda.
Ob-havo sharoitlari dunyoning yirik shakar ishlab chiqaruvchilari — Braziliya, Hindiston va Tailandga sezilarli ta’sir ko‘rsatmoqda. Tahlilchilarga ko‘ra, El-Nino shakar bozoriga eng kuchli ta’sir ko‘rsatuvchi tabiiy hodisalardan biri hisoblanadi.
Braziliyada haddan tashqari yog‘ingarchilik shakarqamishni yig‘ish va qayta ishlashni sekinlashtirmoqda. Hindistonda musson yomg‘irlarining sust kelishi hosildorlikka salbiy ta’sir ko‘rsatmoqda. Tailandning shakar yetishtiriladigan hududlari esa qurg‘oqchilikdan zarar ko‘rgan.
Yevropada esa El-Nino jazirama to‘lqinlarni kuchaytirib, qand lavlagi hosiliga ta’sir ko‘rsatgan. Yevropaning eng yirik ishlab chiqaruvchisi Fransiyada shakar ishlab chiqarish hajmi 1980-yildan buyon eng past darajaga tushishi mumkin.
Shu sababli jahon bozorida shakar narxlari oshmoqda. Joriy yilda uning narxi 18 foizga ko‘tarilgan. Tahlilchilar kelgusi 12 oyda oq shakar narxi yana 20 foiz atrofida oshishi mumkinligini prognoz qilmoqda.
El-Nino boshqa qishloq xo‘jaligi mahsulotlariga ham ta’sir ko‘rsatmoqda. Jumladan, Janubi-Sharqiy Osiyoda guruch, G‘arbiy Afrikada kakao yetishtirish qurg‘oqchilik sabab xavf ostida. Qahva va palma yog‘i ishlab chiqarish ham ob-havo sharoitlaridan zarar ko‘rishi mumkin.
Shu bilan birga, El-Ninoning eng yuqori faollik darajasi joriy yil oxirida kuzatilishi kutilmoqda.
