Ishdan bo‘shatilganlar uchun yangi tartib: muddatidan oldin pensiya olish mumkin
Belgilangan yosh va mehnat stajiga ega bo‘lib, ishdan bo‘shatilgan ayrim fuqarolarga uch oy davomida ish topilmasa, muddatidan oldin yoshga doir pensiya tayinlanadi.
Ayrim hollarda mehnat shartnomasi bekor qilingan va belgilangan ish stajiga ega fuqarolarga muddatidan oldin yoshga doir pensiya tayinlanadi.
28-sentyabr kuni qabul qilingan 519-son Hukumat qarori bilan tasdiqlangan ma’muriy reglamentga ko‘ra, umumiy mehnat staji 25 yildan kam bo‘lmagan 58–60 yoshdagi erkaklar hamda kamida 20 yillik ish stajiga ega 53–55 yoshdagi ayollar muddatidan oldin yoshga doir pensiya tayinlash uchun taqdimnoma rasmiylashtirish bo‘yicha Yagona interaktiv davlat xizmatlari portali orqali murojaat qilishi mumkin.
Buning uchun mehnat shartnomasi bekor qilinganligi haqidagi buyruq nusxasi ilova qilinadi. Mehnat staji to‘liq raqamlashtirilmagan bo‘lsa, mehnat daftarchasi nusxasi ham taqdim etiladi.
Mahalliy mehnat organi taqdim etilgan hujjatlarni ikki ish kuni ichida tekshiradi. Shundan so‘ng murojaat qiluvchi ish qidirayotgan shaxs sifatida ro‘yxatga olinib, uch oy davomida unga maqbul ish topish choralari ko‘riladi.
Agar uch oy ichida maqbul ish topilmasa, fuqaro ishsiz deb e’tirof etiladi va muddatidan oldin pensiya tayinlash uchun taqdimnoma Pensiya jamg‘armasiga yuboriladi.
Pensiya tayinlanganidan so‘ng ishsizlik nafaqasini to‘lash keyingi oydan boshlab to‘xtatiladi. Mazkur davlat xizmatidan foydalanish uchun to‘lov undirilmaydi.
