Delegatsiya rasmiylari Paralimpiya shaharchasiga tashrif buyurdi
Ular sportchilarga yaratilgan sharoitlar bilan yaqindan tanishdi.
O‘zbekiston sport delegatsiyasi Parij-2024 XVII yozgi Paralimpiya o‘yinlarida ishtirok etish uchun Fransiya poytaxtiga yetib keldi. Shu munosabat bilan delegatsiya rahbariyati sportchilarimiz yashayotgan Paralimpiya shaharchasiga tashrif buyurib, u yerda yaratilgan sharoitlar bilan yaqindan tanishdi.
Dastlab, O‘zbekiston Milliy paralimpiya qo‘mitasi raisi – Osiyo Paralimpiya qo‘mitasi vitse-prezidenti Muxtorxon Tashxo'djayev va Sport vaziri o‘rinbosari Murod Ismoilov boshchiligidagi mas’ullar ishtirokida shaharchadagi O‘zbekiston delegatsiyasining tezkor shtabida yig‘ilish o‘tkazildi. Unda har bir mutaxassisga o‘ziga yuklatilgan vazifalarni yuqori darajada bajarish, yurtimiz para atletlari uchun barcha sharoitlarni yaratib berish borasida tegishli ko‘rsatmalar berildi. Rahbarlarimiz bo‘lajak o‘yinlar oldidan duoga qo‘l ochib, matonatli para sportchilarimizga omad va muvaffaqiyatlar tilashdi.
Shundan so‘ng mutasaddilar delegatsiyamiz uchun ajratilgan xonalar, tibbiyot bo‘limi va sportchilarning ovqatlanishlari uchun yaratib berilgan sharoitlarni ko‘zdan kechirishdi.
