Metroga yaqin korxonalar ish vaqti o‘zgarishi kutilmoqda
Unga ko‘ra, ish soat 08:00 da emas 09:00 da boshlanishi mumkin.
Metropoliten bosh muhandisi Mirhokim Mirhusanovning aytishicha, poytaxtda joylashgan yirik ishlab chiqarish tashkilotlari va o‘quv muassasalarida bir vaqtning o‘zida (soat 08:00 va 09:00 oralig‘ida) ish kuni va darslarning boshlanishi ayni shu vaqt oralig‘ida metropolitenda bir qator tirbandliklarni keltirib chiqarmoqda.
U yuzaga kelishi mumkin bo‘lgan yuklamalarni kamaytirish maqsadida metro bekatlariga yaqin bo‘lgan 27 OTMda darslarning boshlanish vaqti differensial tartibda o‘zgartirilganini taʼkidlarkan, yechim sifatida yirik ishlab chiqarish korxonalarida ham ish vaqtini o‘zgartirish taklifi ilgari surilayotganini aytdi.
Toshkent metropoliteni rejim xizmati boshlig‘i o‘rinbosari Abdutohir Abduqodirov ham OTMlarda o‘qishning boshlanish vaqti o‘zgartirilgani ancha ijobiy o‘zgarishlarga olib kelganini qayd etdi. U hukumat, Transport vazirligi hamda tegishli mutasaddilar bilan hamkorlikda yirik korxonalarda ish boshlanishi vaqtini qaytadan ko‘rib chiqish bo‘yicha takliflar ishlab chiqilayotganini qo‘shimcha qildi.
