Endi noqonuniy treninglar uchun jarimalar qo‘llanadi
Bu bo‘yicha qonunchilikka qo‘shimchalar kiritildi.
O‘zbekistonda "Taʼlim to‘g‘risida"gi Qonunga maʼrifiy faoliyatni amalga oshirish tartibini belgilashga qaratilgan qo‘shimchalar kiritildi va ushbu faoliyatni amalga oshirish talablarini buzganlik uchun maʼmuriy javobgarlik belgilandi.
Hozirgi vaqtda ushbu sohaga bo‘lgan qiziqishning ortib borishi va uning asosiy daromad manbaiga aylanishi uni huquqiy tartibga solish zaruratini keltirib chiqarganligi munosabati bilan qonun qabul qilindi.
Ayniqsa, yoshlar o‘rtasida nosog‘lom maʼrifiy ishlarni amalga oshirish holatlari ko‘payib bormoqda, uning doirasida aholi va yoshlarning ongi, madaniyati va his-tuyg‘ulariga turli yot qarashlar va g‘oyalar taʼsir ko‘rsatmoqda.
Maʼmuriy javobgarlik to‘g‘risidagi kodeksga 59-4-modda (maʼrifiy faoliyatni amalga oshirish tartibini buzish) kiritildi.
Endilikda bunday faoliyat bilan shug‘ullanish huquqiga ega bo‘lmagan shaxs tomonidan maʼrifiy faoliyatni amalga oshirish yoki maʼrifiy faoliyatni amalga oshirish uchun qonunchilikda belgilangan cheklovlarga rioya qilmaslik fuqarolarga BHMning 5 baravaridan 10 baravarigacha (1,875 mln so‘mdan 3,75 mln so‘mgacha), mansabdor shaxslarga esa - 10 baravaridan 15 baravarigacha (3,75 mln so‘mdan 5,625 mln so‘mgacha) miqdorda jarima solishga sabab bo‘ladi.
Agar huquqbuzarlik maʼmuriy jazo chorasi qo‘llanilganidan keyin bir yil davomida takror sodir etilsa, fuqarolarga BHMning 10 baravaridan 15 baravarigacha (3,75 mln so‘mdan 5,625 mln so‘mgacha), mansabdor shaxslarga esa - BHMning 15 baravaridan 20 baravarigacha (5,625 mln so‘mdan 7,5 mln so‘mgacha) jarima solishga sabab bo‘ladi.
Shuningdek, "Taʼlim to‘g‘risida"gi Qonunga maʼrifiy faoliyatni belgilash va uni amalga oshirish tartibini belgilash uchun qo‘shimcha kiritildi.
Maʼrifiy faoliyat shaxsning shaxsiy, intellektual va maʼnaviy rivojlanishi uchun zarur ko‘nikma va malakalarni shakllantirish, ijtimoiy va iqtisodiy faollikni oshirish, intellektual va ijodiy salohiyatni namoyon etish, individual salohiyatni, ko‘nikmalarni, kommunikativ qobiliyatlarni takomillashtirishga qaratilgan, davlat taʼlim standartlari bilan qamrab olinmagan faoliyat turi hisoblanadi.
