Rossiya hibsxonasidagi o'zbekistonliklar jazoni O‘zbekistonda o‘tash istagini bildirdi
O‘zbekiston Bosh konsulxonasi Saxalin viloyatidagi muassasada saqlanayotgan O‘zbekiston fuqarolari bilan muloqot qilinib, ularga nisbatan bosim, qiynoq yoki majburiy mehnat qo‘llanilmayotganini, shuningdek harbiy mojarolarga jalb etish holatlari mavjud emasligini tekshirdi.
O‘zbekistonning Vladivostok shahridagi Bosh konsulxonasi diplomatlari xizmat safari doirasida Rossiyaning Saxalin viloyatiga tashrif buyurdi. Bu haqda Dunyo axborot agentligi xabar berdi.
Tashrif davomida diplomatlar Saxalinda joylashgan 1-sonli jazoni ijro etish muassasasida saqlanayotgan 11 nafar O‘zbekiston fuqarolari bilan uchrashuv o‘tkazgan. Mazkur fuqarolar Rossiya Jinoyat kodeksining tegishli moddalari bo‘yicha aybdor deb topilib, jazo muddatini o‘tamoqda.
Uchrashuv chog‘ida konsullik vakillari mahkumlar uchun yaratilgan sharoitlar bilan tanishgan. Jumladan, turar joy binolari, umumiy ovqatlanish joylari hamda madaniy dam olish xonalari ko‘zdan kechirilgan. Shuningdek, vatandoshlar bilan ochiq muloqot tashkil etilgan.
Suhbat davomida mahkumlarning holati, jazo o‘tash jarayonida majburiy mehnat, bosim yoki qiynoq holatlari mavjudligi masalalari o‘rganilgan. Shu bilan birga, ularning Rossiya Mudofaa vazirligi yoki boshqa harbiy tuzilmalar tomonidan qurolli to‘qnashuvlarda ishtirok etishga jalb etilishi ehtimoli yuzasidan ham savollar berilgan. Mahkumlar bunday holatlar kuzatilmaganini ma’lum qilgan.
Shuningdek, ayrim vakillar tomonidan jazo muddatini o‘tash jarayonida harbiy tuzilmalarga jalb etish bo‘yicha tushuntirishlar berilishi, hamda Ukraina hududidagi “maxsus harbiy operatsiya”da ishtirok etgan shaxslarga turli imtiyozlar taklif etilishi haqida ma’lumotlar bildirilgan.
Shu munosabat bilan Bosh konsulxona vakillari O‘zbekiston fuqarolarini chet davlatlar harbiy tuzilmalari yoki qurolli mojarolarda ishtirok etish mamlakat qonunchiligiga zid ekani haqida ogohlantirgan. Ularga O‘zbekiston Jinoyat kodeksining 154-moddasi (“Yollanish”)ga muvofiq bunday harakatlar jinoiy javobgarlikka sabab bo‘lishi mumkinligi tushuntirildi.
Mahkumlar o‘z navbatida muassasa sharoitlaridan qoniqish bildirgan, biroq yaqinlarini sog‘ingani sababli jazo muddatining qolgan qismini O‘zbekistonda o‘tash istagini bildirgan.
Biroq O‘zbekiston va Rossiya o‘rtasida mahkumlarni jazoni o‘tash uchun o‘zaro topshirish bo‘yicha amaldagi ikki tomonlama shartnoma mavjud emasligi sababli, bunday imkoniyat hozircha yo‘qligi ma’lum qilingan.
Uchrashuv yakunida fuqarolarga Bosh konsulxona manzili va aloqa ma’lumotlari taqdim etilgan hamda zarurat tug‘ilganda murojaat qilishlari mumkinligi bildirilgan.
